மூதாட்டி வீட்டில் நகை-பணம் திருட்டு

சேலம் கிச்சிப்பாளையம் ஓந்தாப்பிள்ளை காடு பகுதியை சேர்ந்தவர் விஜயலட்சுமி (வயது 70). இவர் நேற்று முன்தினம் வீட்டை பூட்டி விட்டு வெளியே சென்றார். பின்னர் அவர் திரும்பி வந்து பார்த்தபோது வீட்டின் பூட்டு உடைக்கப்பட்டு கதவு திறந்து கிடந்ததை கண்டு அதிர்ச்சி அடைந்தார். இதையடுத்து வீட்டிற்குள் சென்று பார்த்தபோது, அங்கிருந்த அரை பவுன் நகை மற்றும் ரூ.8 ஆயிரத்தை மர்ம நபர்கள் திருடி சென்றிருப்பது தெரியவந்தது. இதுகுறித்து கிச்சிப்பாளையம் போலீஸ் நிலையத்தில் விஜயலட்சுமி புகார் செய்தார். அதன்பேரில் போலீசார் வழக்குப்பதிவு செய்து மூதாட்டி வீட்டில் நகை-பணத்தை திருடிய நபர்களை வலைவீசி தேடி வருகின்றனர்.