பள்ளி மாணவ-மாணவிகளுக்கு கலைத்திருவிழா போட்டிகள்

உடுமலையில் பள்ளி மாணவ-மாணவிகளுக்கு வட்டார அளவிலான கலைத்திருவிழா போட்டிகள் தொடங்கியது.

கலைத்திருவிழா

தமிழகத்தில் பள்ளி கல்வித்துறையின் அறிவுரைப்படி, பள்ளி மாணவ, மாணவிகளின் கலைத்திறனை வெளிக்கொண்டுவரும் வகையில் அரசு பள்ளிகளில் 6-ம் வகுப்பு முதல் 12-ம் வகுப்பு வரை படிக்கும் மாணவ, மாணவிகளுக்கு கலைகள் சார்ந்த கலைத்திருவிழா போட்டிகள் அந்தந்த பள்ளிகள் அளவில் கடந்த வாரம் நடந்தது.

இந்த போட்டிகள் ஒவ்வொன்றிலும் முதலிடம் பெற்றுள்ள மாணவ, மாணவிகள் வட்டார அளவிலான போட்டிகளில் கலந்து கொள்ள தகுதி பெற்றுள்ளனர்.

வட்டார அளவிலான போட்டிகள்

அதன்படி உடுமலை வட்டார அளவிலான கலைத்திருவிழா போட்டிகள் உடுமலை தளிசாலையில் உள்ள அரசு ஆண்கள் மேல்நிலைப்பள்ளியில் நேற்று தொடங்கியது. போட்டிகள் தொடக்கவிழாவிற்கு உடுமலை ஊராட்சி ஒன்றியக்குழு தலைவர் மு.மகாலட்சுமி முருகன் தலைமை தாங்கி தொடங்கி வைத்தார். இதில் வட்டார கல்வி அலுவலர்கள் சரவணக்குமார், ஆறுமுகம், மனோகரன் ஆகியோர் முன்னிலை வகித்தனர். வட்டார வள மைய ேமற்பார்வையாளர் சண்முகம் வரவேற்று பேசினார்.

போட்டிகள் இசை, நாடகம், பேச்சு, கட்டுரை, ஓவியம், நடனம் உள்ளிட்டு 34 வகையான கலைகள் உள்ளிட்ட போட்டிகள் நடக்கிறது. முதல் நாளான நேற்று 11 மற்றும் 12-ம் வகுப்பு மாணவ-மாணவிகளுக்கான போட்டிகள் நடந்தது. இதில் பல்வேறு போட்டிகளில் 172 மாணவ- மாணவிகள் கலந்து கொண்டனர்.

இன்றும், நாளையும்

9 மற்றும் 10-ம் வகுப்பு மாணவ-மாணவிகளுக்கான போட்டிகள் இன்று (புதன்கிழமை) நடக்கிறது. 6,7 மற்றும் 8-ம் வகுப்பு மாணவ, மாணவிகளுக்கான போட்டிகள் நாளை (வியாழக்கிழமை) மற்றும் 2-ந் தேதி ஆகிய 2 நாட்கள் நடக்கிறது.

போட்டி நடுவர்களாக பல்வேறு பள்ளி ஆசிரியர்கள் நியமிக்கப்பட்டுள்ளனர். போட்டிகளை ஒருங்கிணைப்பாளர்கள் குழுவைச்சேர்ந்த ஆசிரியர்கள் ஒருங்கிணைத்து நடத்தி வருகின்றனர்.