தொழிலாளியை கத்தியால் குத்தி கொல்ல முயற்சி

தூத்துக்குடி சிப்காட் போலீஸ் இன்ஸ்பெக்டர் சண்முகம் தலைமையிலான போலீசார் ரோந்து பணியில் ஈடுபட்டு இருந்தனர். அப்போது, தூத்துக்குடி மடத்தூர் ரோடு 3-வது மைல் பகுதியில் சந்தேகத்துக்கு இடமான முறையில் நின்று கொண்டிருந்தவரை பிடித்து விசாரணை நடத்தினர். விசாரணையில், அவர் தூத்துக்குடி 3-வது மைல், தபால் தந்தி காலனி பகுதியை சேர்ந்த மூர்த்தி மகன் ராஜபாண்டி (வயது 23) என்பதும், அவர் அந்த பகுதியில் வந்துகொண்டிருந்த தொழிலாளி ஒருவரை வழிமறித்து தகராறு செய்து கத்தியால் குத்தி கொலை முயற்சியில் ஈடுபட்டதும் தெரியவந்தது. உடனடியாக போலீசார் வழக்குப்பதிவு செய்து ராஜபாண்டியை கைது செய்தனர். மேலும் கைது செய்யப்பட்ட ராஜபாண்டி மீது ஏற்கனவே தூத்துக்குடி தென்பாகம் மற்றும் சிப்காட் ஆகிய போலீஸ் நிலையங்களில் 8 வழக்குகள் உள்ளது குறிப்பிடத்தக்கது.