கோத்தகிரி புளூ மவுண்டன் அணி வெற்றி

கோத்தகிரி,

நீலகிரி மாவட்ட கிரிக்கெட் சங்கத்தில் புதிய உறுப்பினராக பதிவு செய்து, சி டிவிஷனில் விளையாட விருப்பம் தெரிவித்த அணிகளுக்கு இடையேயான லீக் போட்டிகள் கோத்தகிரி காந்தி மைதானத்தில் நடைபெற்று வருகிறது. இந்தநிலையில் நேற்று கோத்தகிரி புளூ மவுண்டன் அணிக்கும், டிரீம் லெவன் அணிக்கும் இடையே போட்டி நடைபெற்றது. இதில் டாஸ் வென்று முதலில் பேட்டிங் செய்த புளூ மவுண்டன் அணி நிர்ணயிக்கப்பட்ட 35 ஓவர்களில் 8 விக்கெட்டுகளை இழந்து 239 ரன்கள் எடுத்தது. அந்த அணி வீரர்கள் மகேஷ் 65 ரன்கள், வினோத் 41 ரன்கள், முகமது அலி 37 ரன்கள், முருகன் 24 ரன்கள் எடுத்தனர். டிரீம் லெவன் அணி பந்து வீச்சாளர்கள் கிருஷ்ண மூர்த்தி 4 விக்கெட்டுகள், சதிஷ்குமார் 3 விக்கெட்டுகளை வீழ்த்தினர். தொடர்ந்து 240 ரன்கள் எடுத்தால் வெற்றி என்ற இலக்குடன் ஆடிய டிரீம் லெவன் அணியால் 35 ஓவரில் 7 விக்கெட் இழப்பிற்கு 213 ரன்கள் மட்டுமே எடுக்க முடிந்தது. புளூ மவுண்டன் அணி பந்து வீச்சாளர் ராஜ்குமார் 4 விக்கெட்டுகளை வீழ்த்தினார். இதன் மூலம் கோத்தகிரி புளூ மவுண்டன் அணி 26 ரன்கள் வித்தியாசத்தில் வெற்றி பெற்றது.