கோத்தகிரி புளூ மவுண்டன் அணி வெற்றி

கோத்தகிரி

நீலகிரி மாவட்ட கிரிக்கெட் சங்கத்தின் சார்பில் கோத்தகிரி காந்தி மைதானத்தில் மாவட்ட அளவிலான ஏ, பி மற்றும் சி டிவிஷன் கிரிக்கெட் போட்டிகள் நடைபெற்று வருகின்றன. இந்தநிலையில் நேற்று நடைபெற்ற சி டிவிஷன் லீக் போட்டியில் கோத்தகிரி புளூ மவுண்டன் அணி மற்றும் குன்னூர் லெவன்ஸ் அணி பங்கேற்று விளையாடியது. இந்த போட்டியில் டாசை வென்று முதலில் பேட்டிங் செய்த குன்னூர் லெவன்ஸ் அணி நிர்ணயிக்கப்பட்ட 35 ஓவர்களில் 29.4 ஓவர்கள் மட்டும் விளையாடி அனைத்து விக்கெட்டுகளை இழந்து 132 ரன்கள் எடுத்தது. இந்த அணி வீரர் மனோஜ் குமார் அதிகபட்சமாக 56 ரன்கள் எடுத்தார். புளூ மவுண்டன் அணியின் பந்து வீச்சாளர்கள் விவேக் 4 விக்கெட்டுகளையும், முகமது சன்ஷா 3 விக்கெட்டுகளையும் வீழ்த்தினர்.

இதையடுத்து 133 ரன்கள் எடுத்தால் வெற்றி என்ற எளிதான இலக்குடன் தொடர்ந்து விளையாடிய கோத்தகிரி புளூ மவுண்டன் அணி 17.4 ஓவர்களில் 4 விக்கெட்டுக்களை மட்டும் இழந்து 133 ரன்கள் எடுத்து வெற்றி பெற்றது. இந்த அணி வீரர்கள் பரத் 66 ரன்கள் (அவுட் இல்லை), முருகன் 30 ரன்கள் எடுத்தனர். இதன் மூலம் 6 விக்கெட்கள் வித்தியாசத்தில் கோத்தகிரி புளூ மவுண்டன் கிரிக்கெட் அணி வெற்றி பெற்றது.