லாரி மோதி சினிமா உதவி இயக்குனர் பலி

திருச்சி மாவட்டம் சோமரசம்பேட்டை அருகே உள்ள போசம்பட்டி மணியன் நகரை சேர்ந்தவர் மஸ்கான். இவரது மகன் ரவிசந்திரன் (வயது 47). சினிமா உதவி இயக்குனரான இவர் நேற்று காலை சமயபுரத்தில் உள்ள தன்னுடைய நண்பரை பார்த்து விட்டு மீண்டும் வீட்டுக்கு மோட்டார் சைக்கிளில் வந்து கொண்டிருந்தார். குழுமணி அருகே வந்தபோது, சாலையோரத்தில் கிடந்த மண் சறுக்கியதில் அவர் தவறி விழுந்தார். அப்போது, பின்னால் வந்த லாரி ரவிசந்திரன் மீது மோதியது. இதில் பலத்த காயம் அடைந்த அவரை அப்பகுதியினர் மீட்டு திருச்சி அரசு மருத்துவமனையில் சேர்த்தனர். அங்கு அவர் சிகிச்சை பலன் இன்றி இறந்தார். இதுகுறித்த புகாரின் பேரில் ஜீயபுரம் போலீசார் வழக்குப்பதிவு செய்து விசாரணை நடத்தி வருகின்றனர்.