கொடைக்கானலில் சாரல் மழை; சுற்றுலா பயணிகள் அவதி

'மலைகளின் இளவரசி'யான கொடைக்கானலில் கடந்த வாரங்களாகவே கடும் பனிப்பொழிவு நிலவி வருகிறது. மேலும் அதிகாலையில் உறைபனியுடன் கூடிய குளிரும், பகலில் வெப்பமும் நிலவுகிறது. இந்தநிலையில் கிழக்கு திசை காற்றின் வேக மாறுபாடு காரணமாக தமிழகத்தில் 5 நாட்களுக்கு மிதமான மழை பெய்ய வாய்ப்புள்ளதாக சென்னை வானிலை மையம் அறிவித்திருந்தது. அதன்படி, கொடைக்கானல் மலைப்பகுதியில் நேற்று காலை முதல் வானம் மேகமூட்டத்துடன் காணப்பட்டது.

இந்தநிலையில் மதியம் 3 மணிக்கு மேல் கருமேகங்கள் சூழ்ந்து மழை வருவதற்கான சூழல் உருவானது. சிறிது நேரத்தில் சாரல் மழை பெய்தது. மேலும் அடர்ந்த பனிமூட்டமும் நிலவியது. இதனால் வாகன ஓட்டிகள், பொதுமக்கள், சுற்றுலா பயணிகள் அவதியடைந்தனர்.

குறிப்பாக ஏரிச்சாலை, 7 ரோடு சந்திப்பு, கொடைக்கானல் பஸ் நிலையம், மூஞ்சிக்கல் உள்ளிட்ட பகுதிகளில் சாரல் மழையுடன் மூடுபனி நிலவியது. இதனால் வாகன ஓட்டிகள் முகப்பு விளக்குகளை எரியவிட்டபடி வாகனங்களை ஓட்டினர். இருப்பினும் மழையில் நனைந்தபடியே சுற்றுலா பயணிகள், சுற்றுலா இடங்களை பார்வையிட்டு ரசித்தனர்.