வேப்பூர் அருகே திருமண புரோக்கர் அடித்துக் கொலை; மகன் வெறிச்செயல்

ராமநத்தம்,

இ்ந்த பயங்கர சம்பவம் குறித்து போலீஸ் தரப்பில் கூறப்பட்டுள்ளதாவது:-

கடலூர் மாவட்டம் வேப்பூர் அருகே உள்ள ஏ.சித்தூர் கிராமத்தை சேர்ந்தவர் ரெங்கசாமி (வயது 65). திருமண புரோக்கர். இவருக்கு மாலா (60) என்ற மனைவியும், 3 மகள்களும், ஒரு மகனும் உள்ளனர். ரெங்கசாமி தனது 3 மகள்களுக்கும் திருமணம் செய்து வைத்து விட்டார். திருமணமாகாத மகன் குணா(24) அதே ஊரில் உள்ள தனியார் உர தொழிற்சாலையில் வேலைபார்த்து வந்தார். கடந்த சில ஆண்டுகளாக ரெங்கசாமிக்கு தனது மனைவியின் நடத்தை மீது சந்தேகம் ஏற்பட்டு வந்தது.

கணவன்-மனைவி இடையே தகராறு

இந்த நிலையில் கடந்த 6 மாதங்களுக்கு முன்பு கணவன்-மனைவி இருவருக்கும் இடையே தகராறு ஏற்பட்டது. அப்போது மாலா கணவரிடம் கோபித்துக் கொண்டு தனது மகன் குணாவுடன் வீட்டை விட்டு வெளியேறினார். பின்னர் அவர் தனது மகனுடன் விருத்தாசலத்தில் வீடு ஒன்றை வாடகைக்கு எடுத்து வசித்து வந்தார். ரெங்கசாமி மட்டும் ஏ.சித்தூரில் தனியாக வசித்து வந்தார்.

கத்தியால் குத்தி கொல்ல முயன்றதால் ஆத்திரம்

இந்த நிலையில் நேற்று வழக்கம்போல் உர தொழிற்சாலைக்கு வேலைக்கு வந்த குணா சிறுநீர் கழிப்பதற்காக வெளியே சென்றார். அப்போது அங்கு பதுங்கியிருந்த ரெங்கசாமி தனது மகனிடம் தகராறு செய்ததுடன் தான் மறைத்து வைத்திருந்த கத்தியால் குணாவை குத்திக் கொல்ல முயன்றார். இதில் சூதாரித்துக் கொண்ட குணா ஆத்திரத்தில் கீழே கிடந்த உருட்டுக்கட்டையை எடுத்து ரெங்கசாமியை தாக்கினார். இதில் பலத்த காயமடைந்த ரெங்கசாமி ரத்தவெள்ளத்தில் கீழே விழுந்து துடிதுடித்து பரிதாபமாக உயிரிழந்தார். இதைபார்த்து அதிர்ச்சியடைந்த அக்கம் பக்கத்தினர் இதுபற்றி வேப்பூர் போலீசாருக்கு தகவல் தெரிவித்தனர்.

மகன் கைது

அதன் பேரில் போலீசார் சம்பவ இடத்துக்கு விரைந்து வந்து, ரெங்கசாமியின் உடலை கைப்பற்றி பிரேத பரிசோதனைக்காக முண்டியம்பாக்கம் அரசு மருத்துவ கல்லூரி மருத்துவமனைக்கு அனுப்பி வைத்தனர். மேலும் இதுகுறித்த புகாரின் பேரில் போலீசார் கொலை வழக்குப்பதிந்து, குணாவை கைது செய்து விசாரித்து வருகிறார்கள். குடும்ப தகராறு காரணமாக பெற்ற மகனையே கத்தியால் குத்திக் கொல்ல முயன்ற தந்தையை, அவருடைய மகனே அடித்துக் கொலை செய்த சம்பவம் வேப்பூர் பகுதியில் பெரும் பரபரப்பை ஏற்படுத்தியுள்ளது.