இன்னுயிர் காப்போம் திட்டம் மூலம்கிருஷ்ணகிரி மாவட்டத்தில் 1.70 லட்சம் பேருக்கு மருத்துவ சிகிச்சைசுகாதார திட்ட இயக்குனர் கோவிந்தராவ் தகவல்

கிருஷ்ணகிரி

இன்னுயிர் காப்போம் திட்டம் மூலம் கிருஷ்ணகிரி மாவட்டத்தில் இதுவரையில் 1 லட்சத்து 70 ஆயிரம் பேருக்கு மருத்துவ சிகிச்சை அளிக்கப்பட்டுள்ளதாக திட்ட இயக்குனர் கோவிந்தராவ் கூறினார்.

அதிகாரி ஆய்வு

தமிழ்நாடு சுகாதார திட்ட இயக்குனர் கோவிந்தராவ் கிருஷ்ணகிரிக்கு வந்தார். அவர் கிருஷ்ணகிரி நகராட்சி குப்பைமேட்டு தெருவில் உள்ள நகர்புற நல வாழ்வு மையம், ஜெகதேவியில், முதல்-அமைச்சரின் விரிவான மருத்துவ காப்பீட்டுத் திட்டம், பிரதம மந்திரி மக்கள் ஆரோக்கியத் திட்டத்தின் கீழ் 5 லட்சம் காப்பீடு அட்டை பதிவு செய்யும் முகாம், பர்கூர் அரசு மருத்துவமனை மற்றும் கிருஷ்ணகிரி அரசு மருத்துவக்கல்லூரி மருத்துவமனை ஆகிய இடங்களை ஆய்வு செய்தார். அவருடன் மாவட்ட கலெக்டர் சரயு உடன் சென்றார்.

ஜெகதேவி ஊராட்சி மன்ற அலுவலக வளாகத்தில் நடைபெற்ற முதல்-அமைச்சரின் விரிவான மருத்துவ காப்பீட்டுத்திட்டம், பிரதம மந்திரி மக்கள் ஆரோக்கிய திட்டத்தின் கீழ் காப்பீடு அட்டை பதிவு செய்யும் முகாமை பார்வையிட்டு, காப்பீடு அட்டை இணையதளத்தில் பதிவேற்றம் முறை குறித்து ஆய்வு செய்தார். அப்போது 10 பயனாளிகளுக்கு ஆயுஷ்மான் பாரத் பிரதம மந்திரி ஜன் ஆரோக்கிய யோஜனா திட்டத்தின் காப்பீடு அட்டைகளை அவர் வழங்கினார்.

அரசே ஏற்கும்

தொடர்ந்து, பர்கூர் அரசு மருத்துவமனையில் மருத்துவ காப்பீடு திட்டத்தின் கீழ் சிகிச்சை பெற்று வரும் நோயாளிகளிடம் அவர்களுக்கு வழங்கப்படும் சிகிச்சை குறித்து அவர் கேட்டறிந்தார். தொடர்ந்து கிருஷ்ணகிரி அரசு மருத்துவக்கல்லூரி மருத்துவமனையில், இன்னுயிர் காப்போம் 48 திட்டத்தின் கீழ், சிகிச்சை பெற்று வரும் நோயாளிகளிடம் அவர்களுக்கு வழங்கப்படும் சிகிச்சை குறித்து கேட்டறிந்தார்.

இது குறித்து இயக்குனர் கோவிந்தராவ் கூறியதாவது:-

சாலை விபத்தினால் ஏற்படும் உயிர் இழப்புகளை குறைக்கும் வகையிலும் அதனால் குடும்பங்களுக்கு ஏற்படும் மருத்துவ செலவை குறைக்கவும், முதல்-அமைச்சரால் 18.12.2021 அன்று தொடங்கப்பட்ட திட்டம் இன்னுயிர் காப்போம் - நம்மைக் காக்கும் - 48 திட்டம். இத்திட்டத்தின் மூலம் சாலை விபத்தினால் பாதிக்கப்பட்டவர்களுக்கு முதல் 48 மணி நேரத்திற்கான அவசர மருத்துவ சிகிச்சை செலவை தமிழ்நாடு அரசே ஏற்கும். இத்திட்டத்தில் 237 அரசு மருத்துவமனைகள், 451 தனியார் மருத்துவமனைகள் என மொத்தம் 688 மருத்துவமனைகள் மருத்துவ சிகிச்சைகள் வழங்க அங்கீகரிக்கப்பட்டுள்ளன.

1.70 லட்சம் பேருக்கு சிகிச்சை

முதல்-அமைச்சரின் மருத்துவக்காப்பீட்டு அட்டை உள்ளவர்கள், இல்லாதவர்கள், பிற மாநிலத்தவர்கள், வேற்று நாட்டவர்கள் என அனைவருக்கும் தமிழ்நாடு எல்லைக்குள் ஏற்படும் சாலை விபத்துகளுக்கு மருத்துவ சிகிச்சை அளிக்கப்படுகிறது. தேர்ந்தெடுக்கப்பட்ட 81 மருத்துவ சிகிச்சை முறைகளுக்கு, ஒரு நபருக்கு ரூ.1 லட்சம் கட்டண சிகிச்சை மேற்கொள்ளப்படுகிறது.

கிருஷ்ணகிரி மாவட்டத்தில் இன்னுயிர் திட்டத்தின் மூலம் 30.6.2023 வரை அரசு மருத்துவமனைகளில் 1,52,833 பேரும், தனியார் மருத்துவமனையில் 15,314 பேரும் என மொத்தம் 1,70,231 பேருக்கு ரூ.149 கோடியே 86 லட்சம் மதிப்பில் சிகிச்சைகள் வழங்கப்பட்டுள்ளது. இத்திட்டம் மூலம் சாலை விபத்தினால் ஏற்படும் இறப்பு எண்ணிக்கை வெகுவாக குறைக்கப்பட்டுள்ளது.

இவ்வாறு அவர் கூறினார்.

இந்த ஆய்வின் போது, கிருஷ்ணகிரி அரசு மருத்துவக்கல்லூரி மருத்துவமனை முதல்வர் பூவதி, சுகாதாரப்பணிகள் துணை இயக்குனர் ரமேஷ்குமார், முதல் அமைச்சரின் விரிவான மருத்துவக்காப்பீட்டு திட்ட அலுவலர் சையத் அலி, மருத்துவக்கல்லூரி கண்காணிப்பாளர் சந்திரசேகர், தாசில்தார் சம்பத், ஜெகதேவி ஊராட்சி மன்ற தலைவர் ஜெயந்தி, துணைத்தலைவர் சரவணன் மற்றும் சுகாதார அலுவலர்கள், டாக்டர்கள் கலந்து கொண்டனர்.