தொழிலாளிக்கு கத்திக்குத்து; தாய்-2 மகள்கள் கைது

திண்டுக்கல் அருகே உள்ள பாறைப்பட்டியை சேர்ந்தவர் சூர்யா (வயது 24). கூலித்தொழிலாளி. இவரது சித்தி மகள் மனிஷா (25). இவருக்கும், குடைபாறைப்பட்டியை சேர்ந்த சர்தார் (25) என்பவருக்கும் பழக்கம் ஏற்பட்டதாக கூறப்படுகிறது. இதற்கு சூர்யா எதிர்ப்பு தெரிவித்து, மனிஷாவை கண்டித்தார். இதனை மனிஷா, சர்தாரிடம் கூறினார். இதனால் ஆத்திரமடைந்த சர்தார், கடந்த 25-ந்தேதி அவரது நண்பர்களான ரியாஸ் (24), யோகராஜ் (27), கவுதம் (25) ஆகியோருடன் சேர்ந்து சூர்யாவை கத்தியால் குத்தினார். இதில் படுகாயமடைந்த சூர்யா சிகிச்சைக்காக திண்டுக்கல் அரசு மருத்துவமனையில் அனுமதிக்கப்பட்டார்.

இதுகுறித்த புகாரின்பேரில் சர்தார், மனிஷா, அவரது தாயார் தமிழரசி (50), அக்காள் சீமாதேவி (27) உள்பட 7 பேர் மீது திண்டுக்கல் தாலுகா போலீசார் வழக்குப்பதிவு செய்தனர். அதில், சர்தார், ரியாஸ், யோகராஜ், கவுதம் ஆகிய 4 பேரை போலீசார் கைது செய்தனர். மேலும் தலைமறைவான மனிஷா, அவரது தாயார் தமிழரசி, அக்காள் சீமாதேவி ஆகிய 3 பேரை தாலுகா போலீசார் தேடி வந்தனர். இந்தநிலையில் பாறைப்பட்டி பகுதியில் பதுங்கியிருந்த மனிஷா, தமிழரசி, சீமாதேவி ஆகிய 3 பேரை போலீசார் நேற்று கைது செய்தனர்.