சாலையோர வீட்டு சுவர் மீது மோட்டார் சைக்கிள் மோதல்; வாலிபர் பலி

குழித்துறை:

மார்த்தாண்டம் அருகே பாகோடு சீனிவிளையை சேர்ந்தவர் வில்சன், தொழிலாளி. இவருக்கு மனைவியும், விஜின் என்ற மகனும்(வயது 28), ஒரு மகளும் உள்ளனர். விஜினுக்கு இன்னும் திருமணம் ஆகவில்லை. இவர் நட்டாலம் பகுதியில் ஒரு வெல்டிங் பட்டறையில் வேலை செய்து வந்தார். நேற்று முன்தினம் இரவு 11 மணிக்கு விஜின் தனது நண்பர் ஒருவரை பார்த்து வருவதாக தனது மோட்டார் சைக்கிளில் வீட்டில் இருந்து புறப்பட்டு சென்றார். அவர் வட்டவிளை பகுதியில் சென்றபோது திடீரென்று மோட்டார் சைக்கிள் கட்டுபாட்டை இழந்து சாலையோரத்தில் இருந்த காம்பவுண்டு சுவரில் மோதியது. இதில் தூக்கி வீசப்பட்ட விஜின் படுகாயமடைந்து உயிருக்கு போராடிக் கொண்டிருந்தார். இதைகண்டு அதிர்ச்சி அடைந்த அக்கம் பக்கத்தினர் உடனே அவரை மீட்டு சிகிச்சைக்காக குழித்துறை அரசு ஆஸ்பத்திரிக்கு கொண்டு சென்றனர். அங்கு அவரை பரிசோதனை செய்த டாக்டர்கள் விஜின் ஏற்கனவே இறந்து விட்டதாக தெரிவித்தனர். தகவல் அறிந்து வந்த அவரது உறவினர்கள் விஜின் உடலை பார்த்து கதறி அழுந்தனர்.

இதுகுறித்த புகாரின் பேரில் மார்த்தாண்டம் போலீசார் வழக்குப்பதிவு செய்து விசாரணை நடத்தி வருகிறார்கள்.