தமிழகத்தில் திருட்டு போன நடராஜர் சிலை பிரான்சில் கண்டுபிடிப்பு

சென்னை,

தூத்துக்குடி மாவட்டம், கோவில்பட்டி அருகே உள்ள கயத்தாறில் இருக்கும் கோதண்ட ராமேஸ்வரர் கோவிலில் இருந்து பழமையான நடராஜர் உலோக சிலை திருட்டு போய் விட்டது. 15-ம் நூற்றாண்டை சேர்ந்த இந்த சிலை கடந்த 50 ஆண்டுகளுக்கு முன்பு திருட்டு போனது. இது தொடர்பாக கோவில்பட்டி போலீசார் அப்போதே வழக்குப்பதிவு செய்து விசாரித்தனர்.

இந்த நிலையில் இந்த நடராஜர் சிலை, பிரான்ஸ் நாட்டு தலைநகர் பாரீசில் உள்ள ஏலக்கடையில் இருப்பது தெரிய வந்தது. மேலும் அந்த சிலையை ஏலம் விடப்போவதாக அறிவிக்கப்பட்டு இருந்தது.

மீட்டுவர நடவடிக்கை

உடனடியாக சிலை கடத்தல் தடுப்பு பிரிவு போலீசார், பிரான்ஸ் நாட்டு இந்திய தூதரகம் வாயிலாக மேற்படி சிலையை ஏலம் விடாமல் தடுத்து நிறுத்தினார்கள். அந்த சிலையை மீட்டு, தமிழகம் கொண்டு வர உரிய நடவடிக்கை எடுக்கப்படும் என்று போலீசார் அறிவித்துள்ளனர்.