நெரூர் அக்னீஸ்வரர் கோவிலில் நாத உற்சவ விழா

நாத உற்சவ விழா

கரூர் அருகே உள்ள நெரூரில் சவுந்திர நாயகி உடனாகிய அக்னீஸ்வரர் கோவில் உள்ளது. இக்கோவிலில் ஆண்டுதோறும் நாத உற்சவ விழா வெகுவிமரிசையாக நடைபெறுவது வழக்கம். அந்தவகையில் நேற்று 13-ம் ஆண்டு நாத உற்சவ விழா நடைபெற்றது.இதனையொட்டி காலை 6 மணியளவில் அக்னீஸ்வரர் சுவாமிக்கு மங்கள இசையுடன் அபிஷேகம் மற்றும் ஆராதனை நடைபெற்றது. காலை 8.30 மணியளவில் நாதஸ்வரம், தவில், வீணை, வயலின், மிருதங்கம், மோர்சிங், தபேலா, லயம் குழுவினரின் நாத சங்கமமும், 10.30 மணியளவில் அருளுரையும் நடைபெற்றது. பின்னர் மதியம் 2 மணியளவில் தேவார பண்ணிசையும், 3.30 மணியளவில் சிவபுண்ணியம் அருளுரையும் நடைபெற்றது.

இசை நிகழ்ச்சி

இதனைத்தொடர்ந்து மாலை 5 மணியளவில் நாதஸ்வரம், தவில் வித்வான்கள் கலந்து கொண்ட இசை நிகழ்ச்சி நடைபெற்றது. இதில் 300-க்கும் மேற்பட்ட நாதஸ்வர, தவில் வித்வான்கள் கலந்து கொண்டு சிவபெருமானின் பாடல்களை இசைத்தனர். இந்த இசை நிகழ்ச்சி சுமார் 2 மணி நேரம் நடைபெற்றது.இந்நிகழ்ச்சியையொட்டி காலை முதலே நெரூர் உள்பட பல்வேறு பகுதிகளை சேர்ந்த ஏராளமான பக்தர்கள் கலந்து கொண்டு சாமி தரிசனம் செய்தனர். இதில் பக்தர்களுக்கு அன்னதானம் வழங்கப்பட்டது. இதற்கான ஏற்பாடுகளை நெரூர் அக்னீஸ்வரர் வழிபாட்டு மன்றம் செய்திருந்தனர்.