போடி அருகேகிணற்றில் தவறி விழுந்த முதியவர் மீட்பு

போடி அருகே உள்ள சில்லமரத்துபட்டி லால் பகதூர் சாஸ்திரி தெருவை சேர்ந்தவர் உதயசூரியன் (வயது 66). நேற்று இவர் அந்த பகுதியில் நடந்து சென்று கொண்டிருந்தார். அப்போது அங்கிருந்த சுமார் 60 அடி ஆழ கிணற்றில் கால் தவறி அவர் உள்ளே விழுந்தார். கிணறு தண்ணீர் இல்லாமல் வறண்டு கிடந்தது. இதனால் அவர் உள்ளே விழுந்ததில் காயம் அடைந்தார். இதை அந்த வழியாக சென்ற பொதுமக்கள் பார்த்து போடி தீயணைப்பு நிலையத்திற்கு தகவல் கொடுத்தனர். அதன்பேரில் சம்பவ இடத்திற்கு வந்த தீயணைப்பு வீரர்கள் கிணற்றில் இறங்கி சுமார் 1 மணி நேரம் போராடி வலை மூலம் உதயசூரியனை மீட்டு மேலே கொண்டு வந்தனர்.