புதுக்கோட்டை அருகே முதியவரை கொலை செய்த வாலிபர் சிக்கினார்

முதியவர்

தூத்துக்குடி மாவட்டம் புதுக்கோட்டை அருகே உள்ள ராமநாதபுரத்தை சேர்ந்தவர் நம்பி (வயது 70). இவர் சொந்தமாக பண்ணை வைத்து ஆடுகள் வளர்த்து வந்தார். இவர் நேற்று முன்தினம் செட்டிமல்லன்பட்டி காட்டுப்பகுதியில் ஆடுகளை மேய்ச்சலுக்கு விட்டு இருந்தாராம். அப்போது அங்கு அவரது உறவினர் சங்கிலிமாடன் (30) என்பவரும் ஆடுகளை மேய்ச்சலுக்காக கொண்டு வந்தார். அவர்களுக்கு இடையே ஏற்பட்ட வாக்குவாதத்தில், சங்கிலிமாடன், கத்தியால் நம்பியை குத்திக் கொலை செய்தார்.

காரணம் என்ன?

இது குறித்து புதுக்கோட்டை போலீசார் வழக்கு பதிவு செய்து நம்பியை தேடி வந்தனர். நேற்று அவரை புதுக்கோட்டை போலீசார் கைது செய்தனர். அவரிடம் நடத்திய விசாரணையில் சங்கிலி மாடன் கூறும் போது, நாங்களும், பெரியப்பா நம்பியும் அருகருகே ஆட்டுபண்ணை வைத்திருந்தோம். எங்களது ஆடுகள் அவரது தொழுவத்துக்குள் சென்றுவிடுவதால் அவர் அடிக்கடி எங்களை திட்டி வந்தார். இதனால் அவர் மீது எனக்கு ஆத்திரம் இருந்தது. இந்தநிலையில் நேற்று முன்தினம் அவரது ஆடுகள் மேய்ந்த பகுதியில் எனது ஆடுகள் மேய்ச்சலுக்கு சென்றது. இதனால் அவர் என்னை தொடர்ந்து திட்டினார். இதனால் எனக்கு மேலும் ஆத்திரம் ஏற்பட்டு அவரை கத்தியால் குத்திவிட்டு தப்பினேன் என்று தெரிவித்து உள்ளார். இதைத் தொடர்ந்து போலீசார், சங்கிலிமாடனை கோர்ட்டில் ஆஜர்படுத்தி பேரூரணி ஜெயிலில் அடைத்தனர்.