காவிரி ஆற்றில் மூழ்கி முதியவர் சாவு

மயிலாடுதுறை திருவிழந்தூர் ஆடியபிள்ளையார் கோவில் தெருவை சேர்ந்தவர் முனுசாமி (வயது 70). இவர் நேற்று காலை மயிலாடுதுறை தீப்பாய்ந்தாள் அம்மன் கோவில் அருகே காவிரி ஆற்றில் குளித்துக் கொண்டிருந்தார். அப்போது அவர் எதிர்பாராதவிதமாக நீரில் மூழ்கினார். அப்போது காவிரி ஆற்றில் அதிக அளவில் நீர்வரத்து இருந்ததால் முனுசாமியை தண்ணீர் இழுத்துச் சென்றது. அங்கிருந்தவர்கள் இதனை பார்த்து மயிலாடுதுறை தீயணைப்பு நிலையத்திற்கு தகவல் அளித்தனர்.

பிணமாக மீட்பு

அதன்பேரில், தீயணைப்பு துறையினர் சம்பவ இடத்திற்கு விரைந்து வந்து ஆற்றில் இறங்கி முதியவரை தேடினர். நீண்டநேரம் தேடியும் அவரை மீட்க முடியவில்லை. பின்னர் அங்கிருந்து சுமார் 10 கிலோ மீட்டர் தூரம் வரை சென்று கஞ்சாநகரம் என்னும் கிராமத்தில் பிணமாக முனுசாமியை மீட்டனர். பின்னர் அவரது உடல் பிரேத பரிசோதனைக்காக மயிலாடுதுறை அரசு ஆஸ்பத்திரிக்கு அனுப்பி வைக்கப்பட்டது. இதுகுறித்து மயிலாடுதுறை போலீசார் வழக்குப்பதிவு செய்து விசாரணை நடத்தி வருகின்றனர். காவிரி ஆற்றில் அதிகளவு நீர்வரத்து உள்ளதால் ஆற்றில் யாரும் இறங்கி குளிக்க வேண்டாம் என்று மாவட்ட நிர்வாகம் அறிவுறுத்தி உள்ளது குறிப்பிடத்தக்கது.