நகைக்காக மூதாட்டி கொலையா? போலீசார் விசாரணை

மணமேல்குடியை அடுத்த காரக்கோட்டை கோழிசனம் பகுதியை சேர்ந்தவர் சுலோச்சனா (வயது 60). இவர் கடந்த 2-ந்தேதி காணாமல் போனதாக மணமேல்குடி போலீசில் அவரது மகள் புகார் அளித்தார். அதன்பேரில் போலீசார் விசாரணை நடத்தி வந்தனர். இந்தநிலையில் நேற்று சீதாராமன்பட்டினம் கடற்கரை பகுதியில் மூதாட்டி உடல் கிடப்பதாக போலீசாருக்கு தகவல் கிடைத்தது. இதன்பேரில் மணமேல்குடி இன்ஸ்பெக்டர் குணசேகரன் தலைமையிலான போலீசார் சம்பவ இடத்துக்கு விரைந்து சென்று மூதாட்டியின் உடலை கைப்பற்றி பிரேத பரிசோதனைக்கு மணமேல்குடி அரசு மருத்துவமனைக்கு அனுப்பி வைத்தனர். விசாரணையில் காணாமல் போன மூதாட்டி சுலோச்சனா என்பது தெரியவந்தது. மேலும் அவரது உடலில் காயங்கள் இருந்ததால் அவர் நகைக்காக கொலை செய்யப்பட்டாரா? அல்லது வேறு ஏதேனும் காரணமா? என்று போலீசார் விசாரணை நடத்தி வருகிறார்கள்.