கம்பத்தில்வீட்டின் பூட்டை உடைத்து ரூ.1½ லட்சம் திருட்டு:மர்ம நபர்களுக்கு வலைவீச்சு

கம்பம் முகைதீன் ஆண்டவர்புரம் தெருவைச் சேர்ந்தவர் பாரிஷா பேகம் (வயது 54). கடந்த 4-ந்தேதி இவர், குடும்பத்துடன் கேரள மாநிலம் குமுளியில் உள்ள தனது மகள் வீட்டிற்கு சென்றார். பின்னர் மறுநாள் அவர் வீட்டிற்கு திரும்பி வந்தார். அப்போது வீட்டின் கதவில் இருந்த பூட்டு உடைக்கப்பட்டு திறந்து கிடந்தது. இதனால் அதிர்ச்சி அடைந்த அவர் உள்ளே சென்று பார்த்தார். அப்போது பீரோ உடைக்கப்பட்டு அதில் இருந்த பொருட்கள் சிதறி கிடந்தன. மேலும் ரூ.1½ லட்சம் திருடுபோய் இருந்தது.

இதையடுத்து அவர் கம்பம் வடக்கு போலீஸ் நிலையத்தில் புகார் கொடுத்தார். அதன்பேரில் போலீசார் திருட்டு நடந்த வீட்டிற்கு வந்து பார்வையிட்டனர். பின்னர் போலீசார் விசாரணை நடத்தினர். விசாரணையில், வீட்டில் ஆள் இல்லாததை நோட்டமிட்ட மர்ம நபர்கள் பூட்டை உடைத்து உள்ளே சென்றனர். பின்னர் பீரோவில் இருந்த பணத்தை திருடி சென்றது தெரியவந்தது. இதுகுறித்து போலீசார் வழக்குப்பதிவு செய்து பணத்தை திருடி சென்ற மர்ம நபர்களை தேடி வருகின்றனர்.