திறக்காத மதுபான பாருக்கு வசூலித்த உரிமம் கட்டணத்தை திருப்பிக்கேட்ட மனு - அரசுக்கு ஐகோர்ட்டு உத்தரவு

சென்னை,

சென்னை வடபழனியில் உள்ள அம்பிகா எம்பையர் ஓட்டல் நிர்வாகம் சார்பில், சென்னை ஐகோர்ட்டில் தாக்கல் செய்துள்ள மனுவில், "கொரோனா ஊரடங்கு நாடு முழுவதும் கடந்த 2020-ம் ஆண்டு மார்ச் 24-ந் தேதி முதல் அறிவிக்கப்பட்டது.

இதன்படி எங்கள் ஓட்டலும், ஓட்டலில் உள்ள மதுபான கூடமும் (பாரும்) மூடப்பட்டது. அதன் பின்னர், ஓட்டல் மறுசீரமைக்கும் பணி தொடங்கி இன்னமும் நடந்து வருகிறது. ஆனால், 2020-21 மற்றும் 2021-22-ம் ஆண்டுக்களுக்கான மதுபான விற்பனை உரிமம் உள்ளிட்டவைகளுக்கு கட்டணமாக ரூ.9 லட்சத்து 18 ஆயிரத்து 750-ஐ எங்களிடம் இருந்து கலால்துறை வசூலித்து விட்டது. இந்த தொகையை திருப்பிக்கேட்டு 9 முறை மனு கொடுத்தும், எந்த பதிலும் இல்லை" என்று கூறப்பட்டு இருந்தது.

இந்த வழக்கு நீதிபதி அனிதா சுமந்த் முன்பு விசாரணைக்கு வந்தது. மனுதாரர் தரப்பில் வக்கீல் விஜயன் சுப்பிரமணியன் ஆஜராகி வாதிட்டார். இதையடுத்து மனுதாரரின் கோரிக்கையை 6 வாரத்துக்குள் பரிசீலிக்க வேண்டும் என்று கலால்துறை ஆணையருக்கு நீதிபதி உத்தரவிட்டார்.