எழுத்து தேர்வில் வெற்றி பெற்ற பெண்களுக்கு உடல்தகுதி தேர்வு

போலீஸ் சப்-இன்ஸ்பெக்டர் எழுத்து தேர்வில் வெற்றி பெற்ற பெண்களுக்கு உடல்தகுதி தேர்வு திருச்சி மாநகர ஆயுதப்படை மைதானத்தில் நேற்று நடைபெற்றது.

சப்-இன்ஸ்பெக்டர் எழுத்து தோ்வு

தமிழ்நாடு சீருடைப் பணியாளர்கள் தேர்வுக் குழுமம் சார்பில் கடந்த சில மாதங்களுக்கு முன்பு போலீஸ் சப்-இன்ஸ்பெக்டர் பணிக்கான எழுத்து தேர்வு நடைபெற்றது. இந்த தேர்வில் தேர்ச்சி பெற்ற பெண்களுக்கான சான்றிதழ் சரிபார்ப்பு மற்றும் உடல்தகுதி தேர்வு திருச்சி ஆயுதப்படை மைதானத்தில் நேற்று தொடங்கியது.

இதில் எழுத்து தேர்வில் தேர்ச்சி பெற்ற 338 பெண்களுக்கு திருச்சி ஆயுதப்படை மைதானத்தில் நடைபெறும் சான்றிதழ் சரிபார்ப்பு மற்றும் உடல்தகுதி தேர்வில் பங்கேற்க அழைப்பாணை அனுப்பப்பட்டு இருந்தது. அதன்படி, திருச்சி மாநகர போலீஸ் கமிஷனர் கார்த்திகேயன் மேற்பார்வையில் போலீஸ் டி.ஐ.ஜி.க்கள் சரவணசுந்தர், ஜெயபாரதி ஆகியோர் முன்னிலையில் நேற்று காலை 6 மணிக்கு சான்றிதழ் சரிபார்க்கும் பணி தொடங்கியது.

சான்றிதழ் சரிபார்ப்பு

நேற்று 233 பேர் மட்டுமே தேர்வில் கலந்து கொண்டனர். அவர்கள் அழைப்பாணையில் குறிப்பிட்ட நேரத்திற்கு அரை மணி நேரத்திற்கு முன்னரே மைதானத்திற்கு வந்து அறிக்கை செய்தனர். மேலும் சீருடைப்பணியாளர்கள் தேர்வாணையத்தால் வழங்கப்பட்ட அழைப்பாணை, அனைத்து அசல் சான்றிதழ்கள் மற்றும் அதன் 2 நகல்கள், அரசால் அங்கீகரிக்கப்பட்ட புகைப்படத்துடன் கூடிய அசல் உண்மைச்சான்றிதழ் உள்ளிட்டவற்றை கொண்டு வந்திருந்தனர்.

இந்த தேர்வு 2 கட்டமாக நடைபெற்றது. அதில் முதல் கட்டமாக நேற்று சான்றிதழ் சரிபார்ப்பு, உயரம் மற்றும் மார்பு அளவு அளத்தல், 400 மீ. ஓட்டம் ஆகியவை நடத்தப்பட்டது. இதில் பங்கேற்ற 233 பேரில் 105 பேர் தகுதி பெற்றனர். அவர்களுக்கு இன்று (புதன்கிழமை) 2-ம் கட்டமாக உடல் திறன் தேர்வான உயரம் தாண்டுதல் (அல்லது) நீளம் தாண்டுதல், 100 மீட்டர் அல்லது 200 மீட்டர் ஓட்டம் நடைபெற உள்ளது.

பலத்த போலீஸ் பாதுகாப்பு

மைதானத்திற்குள் தேர்வாளர்கள் மட்டுமே அனுமதிக்கப்பட்டனர். மற்ற உறவினர்கள், நண்பர்கள் யாரும் அனுமதிக்கப்படவில்லை. தேர்வர்கள் கொண்டு வந்த செல்போன்கள் நுழைவு பகுதியிலேயே வாங்கி வைக்கப்பட்டன. தேர்வு முழுவதும் வீடியோவில் ஒளிப்பதிவு செய்யப்பட்டது. இந்த தேர்வையொட்டி ஆயுதப்படை மைதானத்தில் நேற்று பலத்த போலீஸ் பாதுகாப்பு போடப்பட்டு இருந்தது.