தர்மபுரி கோட்டத்தில் தேசிய அஞ்சல் வார விழா கொண்டாட்டம்

தர்மபுரி:

தர்மபுரி அஞ்சல் கோட்ட கண்காணிப்பாளர் ராகவேந்திரன் வெளியிட்டுள்ள செய்திக்குறிப்பில் கூறப்பட்டுள்ளதாவது:-

இந்திய அஞ்சல் துறையின் சார்பில் தர்மபுரி அஞ்சல் கோட்டத்தில் தேசிய அஞ்சல் வார விழா நேற்று முதல் கொண்டாடப்பட்டு வருகிறது. நேற்று நிதி வலுவூட்டல் தினமும், இன்று (செவ்வாய்க்கிழமை) தபால் தலை தினமும், நாளை (புதன்கிழமை) தபால் தினமும், நாளை மறுநாள் (வியாழக்கிழமை) சாமானியர் நல் வாழ்வு தினமும் கொண்டாடப்படுகிறது. நிதி வலுவூட்டல் நாளில் அனைத்து தபால் நிலையங்களிலும் சிறப்பு முகாம் நடைபெறும். பொதுமக்கள் அந்த முகாம்களிலும், அருகில் உள்ள தபால் நிலையங்களிலும் சேமிப்பு கணக்கு மற்றும் காப்பீடு பாலிசிகளை தொடங்கி கொள்ளலாம். தபால் தலை தினத்தன்று பள்ளி மாணவ, மாணவிகள் தபால் தலை கணக்குகளை தொடங்கலாம். மேலும் தங்களது புகைப்படத்துடன் கூடிய தபால் தலைகளை அருகில் உள்ள தபால் நிலையங்களுக்கு சென்று ரூ.300 செலுத்தி பெற்று கொள்ளலாம். சாமானியர் நல்வாழ்வு தினத்தன்று அஞ்சலகங்களில் ஆதார் முகாம் நடைபெறும்.

தபால்காரரும் தாத்தா பாட்டியும் என்ற பெயரில் சிறப்பு முகாம் நடைபெற்று வருகிறது. அதில் 60 வயதிற்கு மேற்பட்டவர்கள் மற்றும் ஓய்வு பெற்ற மத்திய, மாநில அரசு ஊழியர்கள், ஓய்வு பெற்ற ராணுவ வீரர்கள் தபால் நிலையங்கள் அல்லது தபால்காரர்களை அணுகி மூத்த குடிமக்கள் சேமிப்பு திட்ட கணக்கை தொடங்கி கொள்ளலாம். இவ்வாறு அதில் கூறப்பட்டுள்ளது.