டாக்டருக்கு உதவிய போலீஸ்காரருக்கு பாராட்டு

திருச்செந்தூரில் மருந்து வாங்க முடியாமல் தவித்த டாக்டருக்கு உதவிய போலீஸ்காரரை போலீஸ் சூப்பிரண்டு பாலாஜி சரவணன் பாராட்டினார்.

உதவி

இலங்கை, கொழும்பில் அறுவை சிகிச்சை டாக்டராக பணியாற்றி ஓய்வு பெற்று, தற்போது கோவையில் வசித்து வரும் டாக்டர் ராமசுப்பு என்பவர் கடந்த 18,19-ந் தேதிகளில் திருச்செந்தூர் கோவிலுக்கு குடும்பத்துடன் வழிபாடு செய்வதற்காக வந்து ஒரு தனியார் விடுதியில் தங்கி உள்ளார். அப்போது 18-ந் தேதி இரவு சுமார் 12.30 மணியளில் ராமசுப்பின் ஒரு வயது பேரனுக்கு அதிக வயிற்றுவலி மற்றும் காய்ச்சல் ஏற்பட்டு அவதிப்பட்டு உள்ளார். இதனால் ராமசுப்பு மருந்து வாங்குவதற்காக விடுதியில் இருந்து வெளியே வந்து மருந்து கடைகளை தேடி அலைந்து உள்ளார். நள்ளிரவாகிவிட்டதால் அனைத்து மருந்து கடைகளும் மூடப்பட்டு இருந்ததால் என்ன செய்வதென்று அறியாமல் பரிதவித்துள்ளார். அப்போது அங்கு நின்று கொண்டிருந்த போலீசாரிடம், தனக்கு அவசரமாக மருந்து வேண்டும் என்று கேட்டு உள்ளார். உடனடியாக அங்குள்ள ஒரு போலீஸ்காரர், மேற்படி ராமசுப்புவிடம், அவர் யார் என கேட்காமல் அவரை அருகில் உள்ள ஆஸ்பத்திரிக்கு, தனது இரு சக்கர வாகனத்தில் அழைத்துச் சென்று அவருக்கு தேவையான மருந்து பொருட்களை வாங்கிக் கொடுத்து உள்ளார்.

பாராட்டு

மேலும் சில மருந்துகள் தேவைப்பட்டதால் அங்கு 24 மணி நேரமும் செயல்படும் என அறிவிப்பு பலகை வைக்கப்பட்டு மூடப்பட்டு இருந்த மருந்து கடையின் உரிமையாளரை உடனடியாக தொடர்பு கொண்டு, கடையை திறக்கச் செய்து ராமசுப்புவுக்கு தேவையான மருந்துப்பொருட்களை வாங்கிக் கொடுத்துள்ளார். மேலும் மருந்து பொருட்கள் வாங்கிய பிறகு மேற்படி ராமசுப்புவை, அவர் தங்கியிருந்து விடுதிக்கே தனது இருசக்கர வாகனத்தில் கொண்டுபோய் இறக்கி விட்டுள்ளார். ராமசுப்பு இறங்கிய பிறகு, உதவி செய்த போலீசாரிடம் தாங்கள் யார் என்று கேட்ட போது, மேற்படி போலீசார் தன்னுடைய பெயர் சிவா என்று மட்டும் கூறிச்சென்றுள்ளார். அதனால் வியந்துபோன டாக்டர் ராமசுப்பு அந்த போலீஸ்காரரின் மனித நேயத்தையும், தன்னலமற்ற சேவை மனப்பான்மையையும் பாராட்டியதோடு, தமிழக போலீஸ் துறையையும் பாராட்டி தூத்துக்குடி மாவட்ட போலீஸ் சூப்பிரண்டுக்கு பாராட்டு கடிதம் அனுப்பி உள்ளார்.

இதனை தொடர்ந்து அந்த போலீஸ்காரர் யாரென்று விசாரித்த போது, திருச்செந்தூர் கோவில் போலீஸ் நிலையத்தில் பணியாற்றி வரும் போலீஸ் ஏட்டு சிவா தங்கதுரை என்பது தெரியவந்தது. இதனையடுத்து நேற்று மாவட்ட போலீஸ் சூப்பிரண்டு பாலாஜி சரவணன் அவரை நேரில் அழைத்து பாராட்டினார்.

----