வெற்றி பெற்ற மாணவர்களுக்கு ரூ.15 ஆயிரம் பரிசுத்தொகை

தஞ்சை மாவட்டத்தில் திருக்குறள் ஒப்புவித்தல் போட்டியில் வெற்றிபெற்ற மாணவர்களுக்கு ரூ.15 ஆயிரம் பரிசுத்தொகை வழங்கப்பட்டது.

திருக்குறள் ஒப்புவித்தல்

தமிழ் வளர்ச்சித்துறையால் ஆண்டுதோறும் 1330 திருக்குறளையும் ஒப்புவிக்கும் மாணவர்களுக்கு ரூ.10 ஆயிரம் பரிசுத்தொகை வழங்கப்பட்டு வந்தது. இந்த நிலையில் 2022-2023-ம் நிதியாண்டில் இருந்து பரிசுத்தொகை ரூ.15 ஆயிரமாக உயர்த்தப்பட்டுள்ளது.அதன்படி மாவட்டங்கள் தோறும் மாணவர்களுக்கு திருக்குறள் ஒப்புவித்தல் போட்டி நடந்து வருகிறது. இந்த நிலையில் தஞ்சை மாவட்டத்தில் திருக்குறள் ஒப்புவித்தல் போட்டியில் வெற்றி பெற்ற மாணவர்களுக்கு பரிசுத்தொகை வழங்கும் நிகழ்ச்சி கலெக்டர் அலுவலகத்தில் நடந்தது.

ரூ.15 ஆயிரம் பரிசுத்தொகை

நிகழ்ச்சிக்கு மாவட்ட வருவாய் அலுவலர் தியாகராஜன் தலைமை தாங்கி வெற்றி பெற்ற 10 மாணவர்களுக்கு தலா ரூ.15 ஆயிரத்துக்கான காசோலை மற்றும் பாராட்டு சான்றிதழ்களை வழங்கினார்.இதைத்தொடர்ந்து தமிழ் வளர்ச்சி துறையின் மூலம் வயது முதிர்ந்த தமிழறிஞர் உதவித்தொகைப் பெற்றுவரும் 12 பேருக்கு கட்டணமில்லா பஸ் பயண சலுகை ஒப்பளிப்பு அரசாணை வழங்கினார்.

மேலும், பள்ளி மாணவர்களுக்கு திருக்குறள் நூல்கள் வழங்கும் திட்டத்தின் கீழ் 27 பள்ளிகளுக்கு நூல்கள் வழங்கப்பட்டது. இதனையடுத்து பள்ளி மாணவர்களுக்கான தமிழ் கையெழுத்துப் போட்டியில் வெற்றிபெற்ற 6 மாணவர்களுக்கு பரிசுத்தொகை, பாராட்டு சான்றிதழ்கள் வழங்கப்பட்டது. நிகழ்ச்சியில் தமிழ் வளர்ச்சி உதவி இயக்குநர் சபீர்பானு, தஞ்சாவூர் திருக்குறள் முற்றோதல் மண்டலப் பயிற்சியாளர் கோபிசிங் ஆகியோர் கலந்து கொண்டனர்.