குடிநீர் வழங்கக்கோரி பொதுமக்கள் சாலை மறியல்

ஆண்டிமடம் அருகே அய்யப்பன்நாயக்கன்பேட்டை பஞ்சாயத்துக்குட்பட்ட தர்மசமுத்திரம் மாவடிகுப்பம் கிராமத்தில் மோட்டார் பழுதடைந்த காரணத்தால் கடந்த சில நாட்களாக அப்பகுதி மக்களுக்கு சரிவர குடிநீர் வழங்கப்படவில்லை என கூறப்படுகிறது. இதனால் அதிருப்தி அடைந்த அப்பகுதி மக்கள் திடீரென சாலை மறியலில் ஈடுபட்டனர். இதுகுறித்து தகவல் அறிந்த ஊராட்சி மன்ற துணை தலைவர் சம்பவ இடத்திற்கு விரைந்து சென்று மறியலில் ஈடுபட்டவர்களிடம் பேச்சுவார்த்தை நடத்தி விரைவில் குடிநீர் வர நடவடிக்கை எடுக்கப்படும் என்று உறுதி அளித்தார். இதில், சமாதானம் அடைந்த பொதுமக்கள் அங்கிருந்து கலைந்து சென்றனர். இந்த சம்பவத்தால் அப்பகுதியில் சிறிது நேரம் பரபரப்பு ஏற்பட்டது.