ஓய்வு பெற்ற ஆசிரியர் கார் மோதி சாவு

ராஜாக்கமங்கலம்:

ராஜாக்கமங்கலம் அருகே கார்-மோட்டார் சைக்கிள் மோதி கொண்ட விபத்தில் ஓய்வு பெற்ற ஆசிரியர் பரிதாபமாக இறந்தார்.

ஓய்வு பெற்ற ஆசிரியர்

ராஜாக்கமங்கலம் அருகே உள்ள எள்ளுவிளை பகுதியை சேர்ந்தவர் ஆறுமுகபெருமாள் (வயது 70). ஓய்வுபெற்ற அரசு பள்ளி ஆசிரியர்.

இவர் நேற்று முன்தினம் மாலை ராஜாக்கமங்கலம் சந்திப்பு பகுதியில் உள்ள ஒரு டீக்கடையில் டீ குடித்துவிட்டு தனது வீடு நோக்கி மோட்டார் சைக்கிளில் சென்று கொண்டிருந்தார். எள்ளுவிளை சந்திப்பில் வரும் போது நாகர்கோவிலில் இருந்து ராஜாக்கமங்கலம் நோக்கி வந்து கொண்டிருந்த கார் ஒன்று கண் இமைக்கும் நேரத்தில் மோட்டார் சைக்கிள் மீது மோதியது. இதில் ஆறுமுகபெருமாள் தூக்கி வீசப்பட்டு படுகாயம் அடைந்தார்.

போலீசார் விசாரணை

ஆபத்தான நிலையில் இருந்த அவரை அக்கம்பக்கத்தினர் மீட்டு ஆசாரிபள்ளம் அரசு மருத்துவக்கல்லூரி ஆஸ்பத்திரிக்கு அனுப்பி வைத்தனர். அங்கு அவருக்கு தீவிர சிகிச்சை அளித்தும் பலன் இல்லாமல் ஆறுமுகபெருமாள் பரிதாபமாக இறந்தார்.

இதுகுறித்து ராஜாக்கமங்கலம் போலீசில் புகார் செய்யப்பட்டது. அதன்பேரில் போலீசார் வழக்குப்பதிவு செய்து விசாரணை நடத்தி வருகிறார்கள்.