சுற்றித்திரியும் பன்றிகளால் தொற்றுநோய் பரவும் அபாயம்

திருக்கடையூர்:

திருக்கடையூர் குடியிருப்பு பகுதிகளில் சுற்றித்திரியும் பன்றிகளால் தொற்றுநோய் பரவும் அபாயம் ஏற்பட்டுள்ளது. இதுகுறித்து நடவடிக்கை எடுக்க பொதுமக்கள் கோரிக்கை விடுத்துள்ளனர்.

சுற்றித்திரியும் பன்றிகள்

மயிலாடுதுறை மாவட்டம் திருக்கடையூரில் அமிர்தகடேஸ்வரர் கோவில் உள்ளது. இங்கு தினந்தோறும் 5 ஆயிரத்்துக்கும் மேற்பட்ட பக்தர்கள் வந்து சாமி தரிசனம் செய்கின்றனர். இந்தநிலையில் பஸ் நிலையம் பின்புறம், சன்னதி தெரு, வடக்கு மடவிளாகம், தெற்கு மடவிளாகம், மேலவீதி, கீழவீதி, கடைத்தெரு, பெருமாள்கோவில்தெரு, அபிஷேக கட்டளை, ஒடக்கரை, பிச்சகட்டளை மற்றும் அதை சுற்றியுள்ள குடியிருப்பு தெருக்களில் 500-க்கும் மேற்பட்ட பன்றிகள் கூட்டம் கூட்டமாக சுற்றித்திரிகின்றன. இங்குள்ள வணிக வளாகங்கள், உணவகங்கள், வீடுகளை சுற்றியும் பன்றிகள் சுற்றித்திரிவதால் கோவிலுக்கு வரும் பக்தர்களும், பொதுமக்களும் அச்சத்துடன் சென்று வருகின்றனர்.

தொற்றுநோய் பரவும் அபாயம்

இதனால் சுகாதார சீர்கேடும், தொற்று நோய் ஏற்படும் அபாயமும் ஏற்பட்டுள்ளது. மேலும் இருசக்கர வாகனங்களில் செல்லும் போது பன்றிகள் திடீரென சாலையின் குறுக்கே ஓடுவதால் அடிக்கடி விபத்து ஏற்படுகிறது. பன்றிகளை பிடிக்க வேண்டும் என்று பலமுறை கோரிக்கை விடுத்தும் நடவடிக்கை எடுக்கவில்லை.

எனவே திருக்கடையூர் குடியிருப்பு பகுதியில் சுற்றித்திரியும் பன்றிகளை பிடித்து அப்புறப்படுத்த சம்பந்தப்பட்ட அதிகாரிகள் நடவடிக்கை எடுக்க வேண்டும் என அந்த பகுதி பொதுமக்கள் கோரிக்கை விடுத்துள்ளனர்.