மோட்டார் சைக்கிள் மீது காா் மோதல்; தொழிலாளி பலி

ஒரத்தநாடு;

ஒரத்தநாடு அருகே மோட்டார் சைக்கிள் மீது கார் மோதிய விபத்தில் தொழிலாளி இறந்தார். சம்பவ இடத்தில் நின்றவர் மீது மற்றொரு மோட்டார் சைக்கிள் மோதி 2 பேர் காயமடைந்தனர்.

தொழிலாளி பலி

ஒரத்தநாட்டை அடுத்துள்ள பொய்யுண்டார்கோட்டை பகுதியைச் சேர்ந்த அன்பழகன். இவருடைய மகன் அறிவழகன்(வயது30). தொழிலாளி. இவர் நேற்று முன்தினம் இரவு ஒரத்தநாட்டில் இருந்து ஊருக்கு மோட்டார் சைக்கிளில் வல்லம் சாலையில் வந்து கொண்டிருந்தார். ஈச்சங்கோட்டை அருகே அவர் சென்று கொண்டிருந்தபோது, அதே சாலையில் இவருக்கு பின்னால் வந்த கார் அறிவழகன் மீது மோதியது. இதில் படுகாயம் அடைந்த அறிவழகன் சம்பவ இடத்திலேயே பரிதாபமாக இறந்தார்.

2 பேர் படுகாயம்

கார் மோதி தொழிலாளி இறந்த இடத்தில் சிலர் நின்று கொண்டிருந்தனர். அப்போது ஒரத்தநாடு பகுதியைச் சேர்ந்த திருமுருகன் என்பவர் ஓட்டி வந்த மோட்டார் சைக்கிள் அங்கு நின்று கொண்டிருந்த தெற்குநத்தம் பகுதியை சசிக்குமார் என்பவர் மீது மோதியது. இதில் படுகாயம் அடைந்த சசிக்குமார் மற்றும் திருமுருகன் ஆகிய இருவரும் தஞ்சாவூர் அரசு மருத்துவ கல்லூரி ஆஸ்பத்திரியில் சிகிச்சைக்காக சேர்க்கப்பட்டுள்ளனர். இது குறித்து ஒரத்தநாடு போலீசார் வழக்குப்பதிவு செய்து விசாரணை நடத்தி வருகின்றனர்.