இறந்த காட்டு பன்றிகளை தீயில் வாட்டிய 2 பேருக்கு தலா ரூ.50 ஆயிரம் அபராதம்

பெரம்பலூர் மாவட்ட வன அலுவலர் குகனேஷ் தலைமையில் பெரம்பலூர் வனச்சரகர் பழனிகுமரன், வனவர் குமார், வனக்காப்பாளர்கள் ரோஜா, ராஜூ, அன்பரசு ஆகியோர் அடங்கிய வனத்துறையினர் நேற்று முன்தினம் இரவு ரோந்து சென்றனர். அப்போது சிறுவாச்சூர்-வேலூர் செல்லும் சாலையில் தனியார் மண்டபம் அருகே சாலையோர ஓடையில் இறந்து கிடந்த 2 காட்டு பன்றிகளை 2 பேர் தீயில் வாட்டி கொண்டிருந்தனர். இதனை கண்ட வனத்துறையினர் அவர்களை பிடித்து விசாரணை நடத்தினர்.

விசாரணையில் அவர்கள் சிறுவாச்சூரை சேர்ந்த பொன்னுசாமி (வயது 48), மனோகரன் (34) என்பது தெரியவந்தது. பின்னர் அவர்களிடம் இருந்த காட்டு பன்றிகளின் உடல்களையும், 2 இருசக்கர வாகனங்களையும் வனத்துறையினர் கைப்பற்றினர். இதையடுத்து அவர்கள் மீது வன உயிரின பாதுகாப்பு சட்டம் 1972-ன் படி வனத்துறையினர் வழக்குப்பதிவு செய்து அவர்களுக்கு தலா ரூ.50 ஆயிரம் அபராதமாக விதித்து வசூலித்தனர். பின்னர் அவர்களை எச்சரித்து அனுப்பினர்.