சத்தியமங்கலம் மார்க்கெட்டில் கனகாம்பரம் கிலோ ரூ.1,000-க்கு ஏலம்

சத்தியமங்கலம் மார்க்கெட்டில் கனகாம்பரம் பூ கிலோ ரூ.1,000-க்கு ஏலம் போனது.

பூக்கள் ஏலம்

ஈரோடு மாவட்டம் சத்தியமங்கலத்தில் உள்ள கரட்டூர் ரோட்டில் பூ மார்க்கெட் செயல்பட்டு வருகிறது. இந்த மார்க்கெட்டில் தினமும் காலை 7 மணி முதல் மதியம் 2 மணி வரை பூக்கள் ஏலம் நடைபெறும். அதன்படி வழக்கம் போல் நேற்று காலை 7 மணி அளவில் பூக்கள் ஏலம் தொடங்கியது.

இந்த ஏலத்துக்கு சத்தியமங்கலம் மற்றும் அதன் சுற்றுவட்டார பகுதிகளில் இருந்து ஏராளமான விவசாயிகள் 3½ டன் பூக்களை விற்பனைக்காக கொண்டு வந்திருந்தனர்.

ரூ.1,000

நேற்றைய ஏலத்தில் மல்லிகைப்பூ கிலோ ரூ.525-க்கும், முல்லை ரூ.360-க்கும் காக்கடா ரூ.175-க்கும், செண்டுமல்லி ரூ.79-க்கும், பட்டுப்பூ ரூ.70-க்கும், ஜாதிமல்லி ரூ.400-க்கும், கனகாம்பரம் ரூ.1,000-க்கும், சம்பங்கி ரூ.25-க்கும், அரளி ரூ.180-க்கும், துளசி ரூ.40-க்கும், செவ்வந்தி ரூ.120-க்கும் விற்பனை ஆனது.

நேற்று முன்தினம் நடந்த ஏலத்தில் மல்லிகைப்பூ கிலோ ஒன்று ரூ.455-க்கும், முல்லை ரூ.300-க்கும், காக்கடா ரூ.150-க்கும், செண்டுமல்லி ரூ.98-க்கும், பட்டுப்பூ ரூ.70-க்கும், ஜாதிமல்லி ரூ.400-க்கும், கனகாம்பரம் ரூ.1,100-க்கும், சம்பங்கி ரூ.25-க்கும், அரளி ரூ.200-க்கும், துளசி ரூ.30-க்கும், செவ்வந்தி ரூ.160-க்கும் விற்பனை ஆனது.

8 நாட்களாக...

இதில் கனகாம்பரம் பூ மட்டும் கடந்த 27-ந் தேதி கிலோ ரூ.820-க்கும், 28-ந் தேதி ரூ.1,420-க்கும், 29-ந் தேதி ரூ.1,120-க்கும், 30-ந் தேதி ரூ.1,250-க்கும், 31-ந் தேதி ரூ.1,255-க்கும், 1-ந் தேதி ரூ.940-க்கும், நேற்று முன்தினம் ரூ.1,100-க்கும், நேற்று ரூ.1,000-க்கும் என தொடர்ந்து 8 நாட்களாக 800 ரூபாய்க்கும் மேல் விலை உயர்ந்து விற்பனை ஆனதால் விவசாயிகள் மகிழ்ச்சி அடைந்து உள்ளனர்.

இதுகுறித்து மார்க்கெட் சங்க நிர்வாகிகள் கூறுகையில், 'மழை காரணமாக கனகாம்பரம் பூக்கள் வரத்து குறைந்துவிட்டது. அதே வேளையில் கனகாம்பரம் பூக்களுக்கான தேவை அதிகம் உள்ளதால் அந்த பூக்களை வாங்க விவசாயிகளிைடயே போட்டி நிலவுகிறது. இதனால் வியாபாரிகள் போட்டி போட்டு கனகாம்பரம் பூக்களை வாங்கி செல்கின்றனர். இதனால் கடந்த 8 நாட்களாக கனகாம்பரம் பூக்கள் விலையில் ஓரளவு ஏற்றம் இறக்கம் இருந்தாலும் ரூ.800-க்கு மேல் விற்பனை ஆகி வருகிறது,' என்றனர்.