ஸ்கூட்டர்-மோட்டார் சைக்கிள் மோதல்; வாலிபர் சாவு

அண்ணாமலைநகர்,

சிதம்பரம் அருகே உள்ள கீழக்குண்டலப்பாடி மாரியம்மன் கோவில் தெருவை சேர்ந்தவர் உத்திராபதி (வயது 49). இவர் அண்ணாமலை பல்கலைக்கழகத்தில் காவலாளியாக பணியாற்றி வருகிறார். இவர் நேற்று முன்தினம் இரவு பணிக்கு செல்வதற்காக அண்ணாமலை நகர் சிவபுரி மெயின் ரோட்டில் ஸ்கூட்டரில் சென்று கொண்டிருந்தார்.

ராஜேந்திர கார்டன் அருகே சென்ற போது எதிரே வந்த மோட்டார் சைக்கிள்- ஸ்கூட்டரில் மோதியது. இதில் உத்திராபதி மற்றும் மோட்டார் சைக்கிளில் வந்த சிதம்பரம் அருகே செட்டிமுட்டு கிராமத்தை சேர்ந்த செல்வகணபதி மகன் பிரகாஷ்(22), மாரியப்பன் மகன் பிரகாஷ்(18) ஆகியோர் படுகாயம் அடைந்தனர்.

அவர்களை அக்கம் பக்கத்தினர் மீட்டு சிகிச்சைக்காக ஆஸ்பத்திரிகளுக்கு அனுப்பி வைத்தனர். இதில் தஞ்சை மருத்துவக்கல்லூரி மருத்துவமனையில் சிகிச்சை பெற்ற செல்வகணபதி மகன் பிரகாஷ், சிகிச்சை பலனின்றி உயிரிழந்தார்.

மேலும் உத்திராபதி, மாரியப்பன் மகன் பிரகாஷ் ஆகியோர் புதுச்சேரி ஜிப்மர் மருத்துவமனையில் சிகிச்சை பெற்று வருகின்றனர். இதுகுறித்த புகாரின் பேரில் அண்ணாமலை நகர் போலீசார் வழக்குப்பதிவு செய்து விசாரணை நடத்தி வருகின்றனர்.