மணல் கடத்திய லாரி பறிமுதல்; டிரைவர் கைது

அன்னவாசல்:

அன்னவாசல் சுற்றுவட்டார பகுதிகளில் உள்ள ஆற்று பகுதிகளில் இருந்து மணல் கடத்தப்படுவதாக மாவட்ட சிறப்பு பிரிவு போலீசாருக்கு தகவல் கிடைத்தது. இதனையடுத்து சிறப்பு பிரிவு சப்-இன்ஸ்பெக்டர் பாலமுருகன் உள்ளிட்ட போலீசார் அன்னவாசல் அருகே உள்ள வயலோகம் பகுதியில் வாகன சோதனையில் ஈடுபட்டனர். அப்போது அவ்வழியாக ஒரு டிப்பர் லாரியை நிறுத்தி சோதனை செய்தனர். அதில் மணல் கடத்தி வந்தது தெரியவந்தது. இதனையடுத்து டிப்பர் லாரியை பறிமுதல் செய்த போலீசார் வயலோகம் பகுதியை சேர்ந்த டிப்பர் லாரி உரிமையாளர் மாணிக்கம், டிரைவர் சிவராசன் ஆகிய இருவர் மீது வழக்குப்பதிவு செய்து டிரைவர் சிவராசனை (வயது 33) கைது செய்து சிறையில் அடைத்தனர்.