தட்டிக்கேட்டவருக்கு கத்திக்குத்து

களியக்காவிளை:

வயதான தம்பதியிடம் பணம் பறிக்க முயற்சித்ததை தட்டிக்கேட்டவருக்கு கத்துகுத்து விழுந்தது.

களியக்காவிளை அருகே வயலங்கரை பகுதியில் டிப்-டாப் ஆசாமி ஒருவர் வங்கியில் இருந்து கடன் பெற்று கொடுப்பதாக கூறியதோடு அதற்கு வைப்பு தொகை தர வேண்டும் என வயதான தம்பதியிடம் கூறியுள்ளார்.

மேலும் இந்த தொகையை கேட்டு அவர் சம்பவத்தன்று வற்புறுத்தியுள்ளார். இதனை கவனித்த அதே பகுதியை சேர்ந்த ரசல்ராஜ், பால்குளம் பகுதியைச் சேர்ந்த ஜோயல் சிங் (43) மற்றும் அந்த பகுதியை சேர்ந்த சிலர் சேர்ந்து எதற்காக பணம் கேட்கிறீர்கள் என கேட்டு விசாரித்துள்ளனர்.அப்போது அந்த நபர் கேரளா மாநிலம் காஞ்சிரம் குளம் பகுதியைச் சேர்ந்த ஷிபு (43) என்பது தெரியவந்தது. பொதுமக்கள் உஷாரானதை அறிந்ததும் ஷிபு மோட்டார் சைக்கிளில் தப்பினார்.

உடனே அவரை பின்தொடர்ந்து ஜோயல் சிங் மற்றும் ஊர் மக்கள் துரத்தினர். அரசமூடு பகுதியில் சென்ற போது நிலைதடுமாறி ஷிபு கீழே விழுந்துள்ளார். அப்போது பிடிக்க முயன்ற ஜோயல்சிங்கை, ஷிபு திடீரென கத்தியால் குத்தினார். இதில் அவருக்கு காயம் ஏற்பட்டது.

பின்னர் மற்றவர்களை கத்தியைக் காட்டி மிரட்டி விட்டு அங்கிருந்து தப்பினார்.

இதுகுறித்த புகாரின் பேரில் களியக்காவிளை போலீசார் வழக்குப்பதிவு செய்து ஷிபுவை தேடி வருகின்றனர்.