மோட்டார் சைக்கிளில் இருந்து கீழே விழுந்த மாணவர் சாவு

அன்னவாசல்:

மாற்று சான்றிதழ் வாங்க...

புதுக்கோட்டை மாவட்டம், சத்தியமங்கலம் உடையாண்டிபட்டியை சேர்ந்தவர் ராசு. இவரது மகன் நவீன்பிரசாத்(வயது 20). இவர் அன்னவாசலை அடுத்த பெருமநாட்டில் உள்ள ஒரு தனியார் கல்லூரியில் படித்து வந்தார்.

இந்நிலையில் 3 ஆண்டு படிப்பு நிறைவடைந்ததை தொடர்ந்து சம்பவத்தன்று மாற்று சான்றிதழ் வாங்குவதற்காக நவீன்பிரசாத் தனது உறவினரான கீரனூர் பகுதியை சேர்ந்த கார்த்திக் என்பவருடன் ஒரு மோட்டார் சைக்கிளில் கல்லூரிக்கு சென்றதாக கூறப்படுகிறது. பின்னர் அதனை வாங்கிக்கொண்டு கல்லூரியில் இருந்து அவர்கள் வீட்டிற்கு திரும்பி வந்து கொண்டிருந்தனர். கார்த்திக் மோட்டார் சைக்கிளை ஓட்ட, நவீன்பிரசாத் பின்னால் அமர்ந்திருந்தார்.

சாவு

புதுக்கோட்டை பெருமநாடு சாலையில் மேலப்பளுவஞ்சி பஸ் நிறுத்தம் அருகே சென்றபோது, எதிர்பாராதவிதமாக நிலைதடுமாறி மோட்டார் சைக்கிளில் இருந்து நவீன்பிரசாத் கீழே விழுந்ததாக கூறப்படுகிறது.

இதில் படுகாயம் அடைந்த அவரை அக்கம் பக்கத்தினர் மீட்டு சிகிச்சைக்காக புதுக்கோட்டை அரசு மருத்துவக்கல்லூரி மருத்துவ மனைக்கு அனுப்பி வைத்தனர். அங்கு சிகிச்சை பலனின்றி அவர் பரிதாபமாக உயிரிழந்தார். அவரது உடலை கண்டு உறவினர்கள் கதறி அழுதனர். இந்த சம்பவம் குறித்து அன்னவாசல் போலீசார் வழக்குப்பதிவு செய்து விசாரணை நடத்தி வருகின்றனர்.

இந்த சம்பவம் அந்த பகுதியில் சோகத்தை ஏற்படுத்தி உள்ளது.