மரிங்கிப்பட்டி அரசு பள்ளியில் மாணவர் தேர்தல்

மாணவர் தேர்தல்

அன்னவாசல் அருகே குடுமியான்மலை ஊராட்சி மரிங்கிப்பட்டியில் அரசு ஆரம்பப்பள்ளி இயங்கி வருகிறது. இந்த பள்ளியில் ஒவ்வொரு ஆண்டும் மாணவர் தேர்தல் நடைபெறுவது வழக்கம். அதன்படி இந்த ஆண்டுக்கான மாணவர் தேர்தல் பள்ளி திறந்ததும் ஜூன் மாதத்தில் இதற்கான தேதி அறிவிக்கப்பட்டது. இதையடுத்து 14 மாணவர்கள் வேட்பாளர்களாக களம் இறங்கினர். அதன்பின்னர் வாக்காளர் பட்டியல் தயார் செய்யப்பட்டது.

முதல் வகுப்பிலிருந்து 5-ம் வகுப்பு வரை படிக்கும் மாணவர்கள் தேர்தலில் வாக்களிக்கவும், வேட்பாளர்களாக நிற்கவும் தகுதி உடையவர்கள் ஆவர். பின்னர் வேட்பாளர்களின் புகைப்படம் அடங்கிய வாக்குச்சீட்டு தயாரிக்கப்பட்டு ஜனநாயக முறைப்படி தேர்தல் நடைபெற்றது.

மந்திரிகளாக பதவி ஏற்பு

இதனைதொடர்ந்து பள்ளி தலைமை ஆசிரியர் நாகலெட்சுமி தேர்தல் அதிகாரியாகவும், பள்ளி மேலாண்மை குழு தலைவர் முத்துமணி, பள்ளி மேலாண்மை குழு உறுப்பினர்கள் கருப்பையா மற்றும் பழனியாண்டி போன்றோர் தேர்தல் அலுவலர்களாகவும் செயல்பட்டனர். பள்ளி மாணவர்கள் வரிசையாக நின்று தங்களுக்கு பிடித்த மாணவர் வேட்பாளருக்கு முறையாக வாக்குகளை செலுத்தி தங்களது ஜனநாயக கடமையை ஆற்றினர்.

இதையடுத்து தேர்தலில் வெற்றி பெற்ற மாணவர்கள் மந்திரிகளாக பதவி ஏற்றுக்கொண்டனர். அதன்படி உள்துறை மந்திரிகளாக பிரவின், தர்விந்தனா, வெளியுறவுத்துறை மந்திரிகளாக சூரியபிரகாஷ், தாரணி, மதிய உணவுத்துறை மந்திரியாக விக்னேஸ்வரன் மற்றும் இணை மந்திரிகள் தேர்ந்தெடுக்கப்பட்டனர். பின்னர் அவர்கள் ஆசிரியர்களுடன் உறுதிமொழி எடுத்துக்கொண்டனர்.

நிகழ்ச்சிக்கான ஏற்பாடுகளை ஆசிரியர் திருப்பதி செய்திருந்தார். தேர்தல் பார்வையாளர்களாக பள்ளி மேலாண்மை குழு உறுப்பினர்களும், பெற்றோர்களும் செயல்பட்டனர்.

தலைமை ஏற்கும் பண்பு

தேர்தல் குறித்து ஆசிரியர் திருப்பதி கூறுகையில், மாணவர்களிடம் இளம் வயதிலேயே அரசியல் பற்றிய ஆர்வத்தையும், தலைமை ஏற்கும் பண்பினையும் வளர்க்க வேண்டியது நமது கடமை. நாட்டின் எதிர்காலம் இன்றைய குழந்தைகளின் கைகளில்தான் இருக்கிறது. எனவே, நல்லவை எது என்பதை மாணவர்களுக்கு சொல்லித்தர வேண்டிய பொறுப்பும், கடமையும் நமக்கு அதிகமாகவே இருக்கிறது.

இதனை மாணவர்கள் உணர வேண்டும் என்பதற்காகவே மாணவர் தேர்தலை நடத்தி வருவதாக கூறினார்.