பஸ் படிகட்டில் தொங்கியபடி பயணம் செய்யும் மாணவர்கள்

அரக்கோணம் புதிய பஸ் நிலையத்திலிருந்து மாவட்டத்தின் பல ஊர்களுக்கும் மற்றும் சுற்றியுள்ள கிராம பகுதிகளுக்கும் அரசு மற்றும் தனியார் பஸ்கள் இயக்கப்பட்டு வருகிறது. இதில் அரசு பள்ளி மாணவ, மாணவிகள் பயணம் செய்து வருகின்றனர். இந்த நிலையில் அரக்கோணத்தில் இருந்து சோளிங்கர் செல்லும் டி45 அரசு பஸ்சில் மாலை நேரத்தில் பள்ளி மாணவர்கள் படிக்கட்டில் தொங்கியபடி ஆபத்தான நிலையில் செல்கின்றனர். இதனால் படிக்கட்டில் தொங்கும் மாணவர்கள் அனைவரையும் இறங்குமாறு டிரைவர் மற்றும் கண்டக்டர் அறிவுறுத்தினர்.

இதற்கு எதிர்ப்பு தெரிவித்த மாணவர்கள் அவர்களை, 'உன் வேலை என்னவோ அதை மட்டும் பார்' என்றும் ஆபாசமாகவும் பேசுவதாக அந்த பஸ்சில் பயணம் செய்யும் பயணிகள் தெரிவிக்கின்றனர். படியில் தொங்க வேண்டாம் என்று சொன்னாலும் கூட, மாணவர்கள் கண்டு கொள்ளாமல், சாகசம் காட்டி வருகின்றனர் என பயணிகள் கூறுகின்றனர். எனவே, காலை மற்றும் மாலை நேரங்களில் போலீசார் கண்காணித்து தகுந்த நடவடிக்கை எடுக்க வேண்டும் என பயணிகள் கோரிக்கை விடுக்கின்றனர்.