மத்திகிரி அருகே வெவ்வேறு இடங்களில் கார் மெக்கானிக் உள்பட 2 பேர் தற்கொலை

மத்திகிரி:

மத்திகிரி அருகே வெவ்வேறு இடங்களில் கார் மெக்கானிக் உள்பட 2 பேர் தற்கொலை செய்து கொண்டனர்.

கார் மெக்கானிக்

கர்நாடக மாநிலம் ஆனேக்கல் அருகே உள்ள அத்திகாரஅள்ளியை சேர்ந்தவர் இம்ரான் பாஷா (வயது 25). இவர் அத்திப்பள்ளியில் கார் மெக்கானிக்காக வேலை செய்து வந்தார். ஓசூர் அருகே உள்ள மத்திகிரிக்கு வந்த அவர், அங்குள்ள தனியார் நிறுவனம் அருகே மரத்தில் தூக்குப்போட்டு தற்கொலை செய்து கொண்டார்.

இதுகுறித்து தகவல் அறிந்த மத்திகிரி போலீசார் அங்கு விரைந்து சென்றனர். பின்னர் இம்ரான் பாஷா உடலை மீட்டு பிரேத பரிசோதனைக்காக ஓசூர் அரசு ஆஸ்பத்திரிக்கு அனுப்பி வைத்தனர். போலீசார் நடத்திய விசாரணையில் அவர் குடும்ப பிரச்சினை காரணமாக தற்கொலை செய்து கொண்டது தெரியவந்தது.

காவலாளி

மத்திகிரி அருகே உள்ள கலுகொண்டப்பள்ளியை சேர்ந்தவர் லோகேஷ் என்கிற கிருஷ்ணப்பா (48). தனியார் பள்ளியில் காவலாளியாக வேலை பார்த்து வந்தார். உடல் நலக்குறைவால் அவதிப்பட்டு வந்த அவர் அதற்காக பல்வேறு ஆஸ்பத்திரிகளில் சிகிச்சை பெற்றும் குணமடையவில்லை.

இதனால் மனமுடைந்த லோகேஷ் கடந்த 10-ந் தேதி வீட்டில் தூக்குப்போட்டு தற்கொலை செய்து கொண்டார். இதுகுறித்து மத்திகிரி போலீசார் வழக்குப்பதிவு செய்து விசாரணை நடத்தி வருகிறார்கள்.