தஞ்சை: சாலையில் இருந்த நெல் குவியல்கள் மீது கார் மோதி விபத்து - ஒருவர் பலி

தஞ்சை,

தஞ்சையை அடுத்துள்ள மருங்குளம் - திருக்கானூர்பட்டி சாலையில் தமிழ்நாடு நுகர்பொருள் வாணிப கழகம் உள்ளது. நுகர்பொருள் வாணிப கழகத்துக்கு எதிரே உள்ள சாலையில் நேற்று நெல்லை காய வைத்துள்ளனர். பின்னர் இரவில் நெல்குவியல்களை மூடி வைத்து உள்ளனர்.

இந்நிலையில் இன்று அதிகாலை மதுக்கூர் ,வடசேரிலிருந்து திருச்சி விமான நிலையத்துக்கு காரில் நெம்மேலி பகுதியை சேர்ந்த திருமூர்த்தி (வயது 58), ராமமூர்த்தி (50), பாலமுருகன் (35), மாரிமுத்து (60), சங்கீதா (40), அன்பரசன் (45), பிரிநீத் (5) ஆகியோர் வந்து கொண்டிருந்தனர்.

அப்போது நுகர்பொருள் வாணிப கழகத்துக்கு எதிரே நெல் காயவைத்துள்ளது தெரியாமல் அதில் உள்ள பேரிகாடில் கார் மோதி விபத்துக்கு உள்ளானது. இதில் காரில் இருந்த அனைவரும் பலத்த காயம் அடைந்தனர். இந்த விபத்தில் பலத்த காயம் அடைந்த திருமூர்த்தி சம்பவ இடத்திலேயே பரிதாபமாக உயிரிழந்தார்.

அக்கம் பக்கத்தினர் காயம் அடைந்தவர்களை மீட்டு சிகிச்சைக்காக தஞ்சையில் உள்ள தனியார் மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.

இந்த விபத்து குறித்து தகவல் அறிந்து வந்த வல்லம் போலீசார் சம்பவ இடத்திற்கு விரைந்து வந்து விபத்தில் பலியான திருமூர்த்தியின் உடலை மீட்டு பிரேத பரிசோதனைக்காக தஞ்சை மருத்துவக்கல்லூரி மருத்துவமனைக்கு அனுப்பிவைத்தனர். மேலும் இது தொடர்பாக வழக்குப்பதிவு செய்து விசாரணை மேற்கொண்டு வருகின்றனர்.