கஞ்சா விற்ற வாலிபர் கைது

மயிலாடுதுறை அவையாம்பாள்புரம் பகுதியில் உள்ள தியேட்டர் அருகில் கஞ்சா விற்பனை நடப்பதாக போலீசாருக்கு தகவல் கிடைத்தது. அதன்பேரில் மயிலாடுதுறை போலீஸ் சப்-இன்ஸ்பெக்டர் மகாதேவன் மற்றும் போலீசார் சம்பவ இடத்திற்கு விரைந்து சென்றனர். அப்போது அங்கு கஞ்சா விற்பனையில் ஈடுபட்ட ஒருவரை போலீசார் சுற்றி வளைத்து பிடித்தனர். பின்னர் அவரிடம் இருந்த ¼ கிலோ கஞ்சாவை பறிமுதல் செய்தனர். விசாரணையில் பிடிபட்டவர் அவையாம்பாள்புரம் காவிரிக்கரை தெருவை சேர்ந்த பக்கிரிசாமி மகன் தமிழ்மணி (வயது30) என்பது தெரியவந்தது. இதனையடுத்து தமிழ்மணி மீது போதைப் பொருள் தடுப்பு சட்டத்தின் கீழ் வழக்குப்பதிவு செய்த போலீசார் அவரை கைது செய்தனர்.