கார் மோதி வாலிபர் சாவு

கண்டாச்சிமங்கலம்

உளுந்தூர்பேட்டை அருகே காட்டுசெல்லூர் கிராமத்தை சேர்ந்தவர் முத்து மகன் கோகுலகிருஷ்ணன்(வயது 18). பிளஸ்-2 முடித்துள்ள இவர் ஆய்வக நுட்புனர் படிப்பில் சேர்வதற்காக விண்ணப்பித்திருந்தார். இதற்காக கோகுலகிருஷ்ணன் சென்னையில் நடைபெற்ற கலந்தாய்வுக்கு சென்றுவிட்டு நேற்று பஸ்சில் ஊருக்கு வந்து கொண்டிருந்தார். வழியில் தியாகதுருகம் புறவழிச்சாலையில் தனியார் உணவகம் அருகே இறங்கிய அவர் சாலையோரமாக நின்று கொண்டிருந்தார். அப்போது சென்னையில் இருந்து கோவை நோக்கி வந்த கார் கோகுலகிருஷ்ணன் மீது மோதியது. இதில் படுகாயங்களுடன் தூக்கி வீசப்பட்ட அவர் சம்பவ இடத்திலேயே பரிதாபமாக இறந்தார். இது பற்றிய தகவல் அறிந்த தியாகதுருகம் போலீசார் சம்பவ இடத்துக்கு விரைந்து வந்து கோகுலகிருஷ்ணனின் உடலை பிரேத பரிசோதனைக்காக கள்ளக்குறிச்சி அரசு ஆஸ்பத்திரிக்கு அனுப்பி வைத்தனர். இதுகுறித்து அவரது தந்தை முத்து கொடுத்த புகாரின் பேரில் கார் டிரைவர் சென்னை தென்பழனி நகர் பகுதியை சேர்ந்த நந்தகுமார்(39) என்பவர் மீது தியாகதுருகம் போலீசார் வழக்குப்பதிவு செய்து விசாரணை நடத்தி வருகின்றனர்.