ஆம்புலன்ஸ் வாகனம் மோதி வாலிபர் பலி

பணகுடி:

பணகுடி பாஸ்கராபுரத்தைச் சேர்ந்தவர் அய்யாச்சாமி. இவருடைய மகன் பார்த்திபன் (வயது 28). இவரது பக்கத்து வீட்டில் வசிப்பவர் முத்து மகன் முகேஷ் (23). நண்பர்களான இவர்கள் 2 பேரும் நேற்று முன்தினம் மாலையில் வள்ளியூரில் இருந்து பணகுடிக்கு மோட்டார் சைக்கிளில் சென்று கொண்டிருந்தனர். பணகுடி அருகே கலந்தபனை நாற்கரசாலையில் சென்றபோது, முன்னால் சென்ற லாரியின் பின்புறத்தில் எதிர்பாராதவிதமாக மோட்டார் சைக்கிள் மோதியது. இதில் நிலைதடுமாறி கீழே விழுந்த பார்த்திபன் மீது அந்த வழியாக வந்த ஆம்புலன்ஸ் வாகனம் மோதியது. இதில் பலத்த காயமடைந்த அவர் சம்பவ இடத்திலேயே பரிதாபமாக இறந்தார். முகேஷ் அதிர்ஷ்டவசமாக காயமின்றி உயிர் தப்பினார். இதுகுறித்து தகவல் அறிந்ததும், பணகுடி போலீசார் சம்பவ இடத்துக்கு விரைந்து சென்று, இறந்த பார்த்திபனின் உடலைக் கைப்பற்றி பிரேத பரிசோதனைக்காக நாகர்கோவில் ஆசாரிபள்ளம் அரசு ஆஸ்பத்திரிக்கு அனுப்பினர். மேலும் இதுதொடர்பாக வழக்குப்பதிவு செய்து விசாரணை நடத்தி வருகின்றனர்.