பெண்களை ஆபாச படம் எடுத்த புகாரில் கைதான சினிமா இயக்குனரை சொந்த ஊருக்கு அழைத்து சென்று விசாரணை

சினிமா இயக்குனர் கைது

சேலம் மாவட்டம் எடப்பாடி அடுத்த வீரப்பன்பாளையத்தை சேர்ந்தவர் வேல்சத்ரியன் (வயது 38). சேலத்தில் சினிமா கம்பெனி நடத்தி வரும் இவர், சினிமாவில் நடிக்க வாய்ப்பு தருவதாக கூறி பல பெண்களை ஆபாச படம் எடுத்ததாக புகார் எழுந்தது.

இது தொடர்பான புகாரின் பேரில் சூரமங்கலம் போலீசார் வழக்குப்பதிவு செய்து வேல்சத்ரியன் மற்றும் அவரது உதவியாளர் ஜெயஜோதி (23) ஆகியோரை கைது செய்து சிறையில் அடைத்தனர்.

சினிமா இயக்குனர் வேல்சத்ரியன் சுமார் 300-க்கும் மேற்பட்ட பெண்களிடம் பணம் வசூலித்ததுடன், அவர்களை ஆபாச படம் எடுத்ததாகவும் கூறப்பட்டது. இது தொடர்பாக போலீஸ் அதிகாரிகள் விசாரணை நடத்தி வருகின்றனர்.

காவலில் எடுத்து விசாரணை

இதனிடையே பெண்கள் சிறையில் அடைக்கப்பட்ட ஜெயஜோதியை போலீசார் ஏற்கனவே காவலில் எடுத்து விசாரணை நடத்தினர். அப்போது பல தகவல்கள் போலீசாருக்கு கிடைத்துள்ளதாக கூறப்படுகிறது.

இந்தநிலையில் சினிமா இயக்குனர் வேல்சத்ரியனை 6 நாட்கள் நீதிமன்ற காவலில் எடுத்து விசாரணை நடத்த போலீசாருக்கு அனுமதி வழங்கப்பட்டது. அதன்பேரில் இளம்பெண்களை மயக்கியது எப்படி? என பல்வேறு கேள்விகளை கேட்டு 2-வது நாளாக வேல்சத்ரியனிடம் விசாரணை நடத்தப்பட்டது.

பின்னர் அவரது சொந்த ஊரான எடப்பாடிக்கு போலீசார் அழைத்து சென்று விசாரணை நடத்தினர். மேலும் அவரது வீட்டில் பெண்களின் ஆபாச படங்கள் அடங்கிய ஹார்டு டிஸ்க், கணினி ஏதேனும் உள்ளதா? என்பது குறித்து சோதனை செய்தனர்.

மீண்டும் சிறையில் அடைப்பு

ஆனால் போலீசார் எதிர்பார்த்த அளவுக்கு அவரது வீட்டில் எதுவும் சிக்கவில்லை என கூறப்படுகிறது. இதனால் 6 நாட்கள் விசாரணை நடத்த இருந்தநிலையில் நேற்று 2 நாளிலேயே விசாரணை முடிவடைந்து விட்டதாக கூறப்படுகிறது.

சினிமா இயக்குனர் வேல்சத்ரியன் சுமார் 300-க்கும் மேற்பட்ட பெண்களிடம் பணம் வசூலித்ததுடன், அவர்களை ஆபாச படம் எடுத்ததாகவும் கூறப்பட்ட நிலையில் இரண்டே நாட்களில் போலீசார் விசாரணையை முடித்துள்ளனர். இதையடுத்து அவரை மீண்டும் கோர்ட்டில் ஆஜர்படுத்தி நேற்று இரவு சேலம் சிறையில் அடைத்து உள்ளனர்.