விவசாயி பலி

நாங்குநேரி:

நாங்குநேரி அருகே இறைப்புவாரியைச் சேர்ந்தவர் பொன்னுதுரை (வயது 55) விவசாயி. இவருடைய மனைவி கனி (50). இவர்களுக்கு 2 மகள்கள், ஒரு மகன் உள்ளனர்.

நேற்று காலையில் பொன்னுதுரை வழக்கம்போல் அப்பகுதியில் உள்ள தனது வயலுக்கு புறப்பட்டு சென்றார். அப்போது வயலில் உள்ள மின்கம்பத்தில் இருந்த மின்பெட்டி சரிந்து கிடந்தது. உடனே பொன்னுதுரை அந்த மின்பெட்டியை தூக்கி சரி செய்ய முயன்றார். அப்போது எதிர்பாராதவிதமாக அவர் மீது மின்சாரம் தாக்கியதில் சம்பவ இடத்திலேயே பரிதாபமாக இறந்தார்.

இதற்கிடையே வயலுக்கு வந்த கனி தனது கணவர் பொன்னுதுரையை காப்பாற்ற முயன்றார். அப்போது கனியின் மீதும் மின்சாரம் தாக்கியது. எனினும் அவர் அதிர்ஷ்டவசமாக உயிர் தப்பினார். அவரது அலறல் சத்தம் கேட்டு அக்கம்பக்கத்தினர் ஓடி வந்து, மின் இணைப்பை துண்டித்தனர்.

இதுகுறித்து நாங்குநேரி போலீசாருக்கு தகவல் தெரிவிக்கப்பட்டது. உடனே போலீசார் விரைந்து சென்று, பொன்னுதுரையின் உடலை கைப்பற்றி பிரேத பரிசோதனைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர்.

இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.