டிராக்டரை ஏற்றி விவசாயி ெகாலை

திருவெண்காடு:

திருவெண்காடு அருகே டிராக்டரை ஏற்றி விவசாயி கொலை செய்யப்பட்டார். இது ெதாடர்பாக ஊராட்சி துணைத்தலைவர் உள்பட 2 பேரை போலீசார் கைது செய்தனர்.

விவசாயி

மயிலாடுதுறை மாவட்டம் திருவெண்காடு அருகே உள்ள பெருந்தோட்டம் கோசாலை தெருவை சேர்ந்தவர் ராஜேந்திரன்(வயது 62). விவசாயியான இவர் தனக்கு சொந்தமான இடத்தில் உள்ள மண்ணை அதே ஊரை சேர்ந்த ஊராட்சி மன்ற துணைத்தலைவரும், அ.தி.மு.க. பிரமுகருமான பாஸ் என்கின்ற பாஸ்கரன் என்பவரிடம் செங்கல்சூளை பயன்பாட்டிற்காக குறிப்பிட்ட தொகைக்காக விற்றதாக தெரிகிறது.

இதனைத்தொடர்ந்து கடந்த சில நாட்களாக அங்கு மணல் எடுக்கப்பட்டு வந்தது. நேற்று முன்தினம் இரவு மணல் ஏற்றிக் கொண்டிருந்தபோது அங்கு வந்த விவசாயி ராஜேந்திரன், மணலுக்கு பேசியபடி தொகை தராமல் எப்படி மண் ஏற்றுகிறீர்கள்? என கேட்டு டிராக்டர் டிரைவரிடம் வாக்குவாதத்தில் ஈடுபட்டதாக தெரிகிறது.

டிராக்டரை ஏற்றி கொலை

இது தொடர்பாக அவர்களுக்கு இடையே வாக்குவாதம் முற்றி கைகலப்பு ஏற்பட்டுள்ளது. அப்போது டிராக்டர் டிரைவர், டிராக்டரை விவசாயி ராஜேந்திரன் மீது ஏற்றி உள்ளார். இதில் பலத்த காயம் அடைந்த ராஜேந்திரன் அதே இடத்தில் பரிதாபமாக இறந்தார்.

இதற்கிடையில் ராஜேந்திரனை காணாமல் அவரது குடும்பத்தினர் அக்கம், பக்கம் தேடிப்பார்த்தனர். அப்போது மணல் எடுக்கும் இடத்தில் ரத்த வெள்ளத்தில் ராஜேந்திரன் இறந்து கிடந்தது தெரிய வந்தது. இதுகுறித்து அவர்கள் போலீசாருக்கு தகவல் தெரிவித்தனர்.

ஊராட்சி துணைத்தலைவர் உள்பட 2 பேர் கைது

தகவல் அறிந்து சீர்காழி போலீஸ் துணை சூப்பிரண்டு லாமேக், திருவெண்காடு போலீஸ் இன்ஸ்பெக்டர் அண்ணாதுரை, கிராம நிர்வாக அலுவலர் ராதாகிருஷ்ணன் மற்றும் போலீசார் சம்பவ இடத்துக்கு விரைந்து சென்று பார்வையிட்டு விசாரணை நடத்தினர்.

பின்னர் ராஜேந்திரனின் உடலை கைப்பற்றி பிரேத பரிசோதனைக்காக சீர்காழி அரசு ஆஸ்பத்திரிக்கு அனுப்பி வைத்தனர். இது குறித்த புகாரின் பேரில் ஊராட்சி மன்ற துணைத் தலைவர் பாஸ் என்கின்ற பாஸ்கரன் (45), டிராக்டர் டிரைவர் பாலா என்கிற பாலசுப்பிரமணியன்(32) ஆகிய இருவரையும் கைது செய்தனர்.

பதற்றம்-போலீஸ் பாதுகாப்பு

மண் எடுக்கும் பிரச்சினையில் விவசாயி டிராக்டரை ஏற்றி கொலை செய்யப்பட்ட சம்பவத்தால் அந்த பகுதியில் பதற்றம் நிலவுகிறது. இதனையொட்டி அங்கு போலீசார் பாதுகாப்பு பணியில் ஈடுபட்டு வருகிறார்கள்.