கார் விபத்தில் காயம் அடைந்தவர் சாவு

முக்கூடல்:

பேட்டை காந்திமதி நகரைச் சேர்ந்தவர் பரமசிவம் (வயது 81). சம்பவத்தன்று இவர் தனது மகன் சுப்பிரமணியன் (40), மருமகள் பேச்சியம்மாள் (36), பேத்தி பவித்ரா (13), பேரன் மாதேஸ்வரன் (11) ஆகியோருடன் குலதெய்வ கோவிலுக்கு செல்வதற்காக பேட்டையில் இருந்து கடையம் நோக்கி காரில் சென்று கொண்டிருந்தார். காரை பரமசிவம் ஓட்டினார். பாப்பாக்குடி அருகே செங்குளம் - இடைகால் மெயின் ரோட்டில் புதிதாக கட்டப்பட்டுள்ள ஓடைப்பாலம் அருகே சென்றபோது கார் நிலைதடுமாறி விபத்துக்குள்ளானது. இதில் காயம் அடைந்தவர்களை அக்கம்பக்கத்தினர் மீட்டு அம்பை அரசு ஆஸ்பத்திரிக்கு அனுப்பி வைத்தனர். பின்னர் மேல்சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைக்கப்பட்டனர். அங்கு சிகிச்சை பலன் அளிக்காமல் பரமசிவம் நேற்று இறந்தார். இதுகுறித்து பாப்பாக்குடி போலீசார் வழக்குப்பதிவு செய்து விசாரணை நடத்தி வருகின்றனர்.