வாக்காளர்களை அடைத்துவைக்கும் அநியாயம் வேறு எங்கும் நடக்கவில்லை -அண்ணாமலை பேச்சு

ஈரோடு,

ஈரோடு கிழக்கு தொகுதி இடைத்தேர்தலில் போட்டியிடும் அ.தி.மு.க. வேட்பாளர் கே.எஸ்.தென்னரசுக்கு ஆதரவாக பா.ஜ.க. மாநில தலைவர் அண்ணாமலை ஈரோட்டில் நேற்று இரவு தேர்தல் பிரசாரத்தில் ஈடுபட்டார்.

அப்போது அவர் கூறியதாவது:-

கடந்த சட்டமன்ற தேர்தலில் தி.மு.க. 517 வாக்குறுதிகளை அளித்து ஆட்சியை பிடித்தது. தற்போது 3-ல் ஒரு பங்கு ஆட்சிக்காலம் முடிவடைந்த நிலையில் 49 தேர்தல் வாக்குறுதிகள் மட்டுமே நிறைவேற்றப்பட்டு உள்ளன.

கியாஸ் சிலிண்டர் மானியம்

தி.மு.க. அளித்த வாக்குறுதியில் பெண்களுக்கு மாதந்தோறும் ரூ.1,000 உரிமைத்தொகை வழங்கப்படும் என்று கூறப்பட்டு இருந்தது. அப்படியென்றால் 22 மாதத்திற்கு ரூ.22 ஆயிரம் தந்திருக்க வேண்டும். சமையல் கியாஸ் சிலிண்டருக்கு ரூ.100 மானியம் கொடுப்பதாக தெரிவித்தனர். ஈரோடு கிழக்கு தொகுதியில் மட்டும் 1 லட்சத்து 21 ஆயிரம் பெண்கள் சமையல் கியாஸ் சிலிண்டரை பயன்படுத்தி வருகிறார்கள். இந்த மானியம் கொடுத்து இருந்தால் இதுவரை ரூ.2 ஆயிரத்து 200 வங்கி கணக்கில் வரவு வைக்கப்பட்டு இருக்க வேண்டும்.

எனவே உங்களிடம் வாக்கு கேட்க வரும் அமைச்சர்களிடம் ரூ.24 ஆயிரத்து 200 கொடுக்க வேண்டும் என்று கேளுங்கள்.

சட்டம் ஒழுங்கு சீர்கேடு

இந்த இடைத்தேர்தலில் வாக்காளர்களை பட்டியில் அடைத்து வைத்து தமிழக அரசியலை 1950-60 காலகட்டத்துக்கு தி.மு.க. எடுத்து சென்றுள்ளது. இந்தியாவில் வேறு எங்கும் இந்த அநியாயம் நடக்கவில்லை. இங்கு முகாமிட்டு உள்ள 30 அமைச்சர்களும், வருகிற 27-ந் தேதி வரை மட்டுமே வாக்காளர்களுக்கு ராஜ மரியாதை அளிப்பார்கள். அதன்பிறகு, அவர்கள் ஓடி விடுவார்கள். ஆனால், அ.தி.மு.க. சார்பில் 2 முறை வெற்றி பெற்றுள்ள வேட்பாளர் தென்னரசு, இதே பகுதியில் இருசக்கர வாகனத்தில் எளிமையோடு உங்களை சுற்றி வருவார். காங்கிரஸ் வேட்பாளர் வெற்றி பெற்றால் சென்னையில்தான் இருப்பார்.

கடந்த 22 மாத கால தி.மு.க. ஆட்சியில், சட்டம் ஒழுங்கு சீர்கெட்டு, நிர்வாகம் சீர்கேடு அடைந்துள்ளது. இப்படி தடம்புரண்டு செல்லும் ஆட்சியை சரிசெய்ய, ஒரு பெரிய மணியாக இந்த இடைத்தேர்தல் முடிவு இருக்க வேண்டும்.

வாக்குறுதிகள்

அ.தி.மு.க. வேட்பாளர் வெற்றி பெற்றால் ஆட்சி மாறாது. ஆனால் அவர் வெற்றி பெற்று கோட்டைக்கு சென்றால்தான் தி.மு.க. அளித்த தேர்தல் வாக்குறுதிகள் உடனடியாக நிறைவேறும்.

இவ்வாறு அவர் கூறினார்.

இந்த பிரசாரத்தின்போது வேட்பாளர் கே.எஸ்.தென்னரசு மற்றும் அ.தி.மு.க., கூட்டணி கட்சியினர் உடனிருந்தனர்.