வாலிபரை கத்தியால் வெட்டியவர் கைது

விழுப்புரம் பாப்பான்குளம் பகுதியை சேர்ந்தவர் ஷேக் அஸ்கர். இவர் நேற்று முன்தினம் இரவு மந்தக்கரை பகுதியில் மதுபோதையில் சென்று கொண்டிருந்தார். அப்போது அங்கு வந்த அதே பகுதியை சேர்ந்த ரகுமான் என்பவரை அவர் திடீரென தாக்கினார். இது குறித்து ரகுமான் தனது சகோதரரான ஆதம்அலியிடம் கூறியுள்ளார். இதையடுத்து ஆதம்அலி (வயது 30) தனது உறவினர் அபுதாகிருடன் மந்தக்கரைக்கு சென்று அங்கிருந்த ஷேக்அஸ்கரிடம், ரகுமானை எதற்காக அடித்தீர்கள் என்று கேட்டு வாக்குவாதம் செய்துள்ளனர். இதில் ஆத்திரம் அடைந்த ஷேக்அஸ்கர், கறிவெட்டும் கத்தியால் ஆதம் அலியை சரமாரியாக வெட்டினார். இதில் பலத்த காயமடைந்த அவர் சிகிச்சைக்காக முண்டியம்பாக்கம் அரசு மருத்துவக்கல்லூரி மருத்துவமனையில் அனுமதிக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்து வருகின்றனர். இதுகுறித்த புகாரின் பேரில் விழுப்புரம் நகர போலீசார் வழக்குப்பதிவு செய்து ஷேக்அஸ்கரை கைது செய்து விசாரணை நடத்தி வருகின்றனர்.