பெண்ணுக்கு கொலை மிரட்டல் விடுத்தவர் கைது

போடி அருகே உள்ள சங்கராபுரத்தை சேர்ந்தவர் தமிழ்செல்வி (வயது 58). இவரது பக்கத்து வீட்டை சேர்ந்தவர் அழகர்ராஜா. இவர், அடிக்கடி தமிழ்செல்வியிடம் தகராறு செய்ததாக கூறப்படுகிறது. இதுகுறித்து தமிழ்செல்வி தனது மகன் அழகரிடம் கூறினார். இதனால் அழகர் மற்றும் அவரது உறவினர்கள் அழகர்ராஜாவை கண்டித்தனர்.

இந்நிலையில் நேற்று காலை தமிழ்செல்வி தனது வீட்டிற்கு வெளியே நின்று கொண்டிருந்தார். அப்போது அங்கு வந்த அழகர்ராஜா அவரிடம் தகராறு செய்து தகாத வார்த்தைகளால் பேசியதுடன், கைகளால் தாக்கியதாக தெரிகிறது. மேலும் தான் மறைத்து வைத்திருந்த கத்தியை காட்டி கொலை மிரட்டல் விடுத்துள்ளார். இதுகுறித்து தமிழ்செல்வி போடி தாலுகா போலீஸ் நிலையத்தில் புகார் செய்தார். அதன்பேரில் போலீசார் வழக்குப்பதிந்து அழகர்ராஜாவை கைது செய்தனர்.