மரத்தில் மோட்டார் சைக்கிள் மோதி மேஸ்திரி பலி

கே.வி.குப்பம் தாலுக்கா லத்தேரியை அடுத்த மாளியப்பட்டு பள்ளகொல்லை கிராமத்தை சேர்ந்தவர் கிருஷ்ணன். இவரது மகன் பிரபு (வயது 25), கட்டிட மேஸ்திரி. இவர் லத்தேரியில் நடைபெற்ற திருமண வரவேற்பு நிகழ்ச்சிக்கு மோட்டார் சைக்கிளில் சென்றுவிட்டு, மீண்டும் வீட்டிற்கு திரும்பிக் கொண்டிருந்தார்.

அப்போது சாலைஓரம் உள்ள புளிய மரத்தின் மீது மோதி தூக்கி வீசப்பட்டார். இதில் படுகாயம் அடைந்த பிரபுவை, வேலூர் அரசு மருத்துவமனைக்கு அனுப்பி வைத்தனர். ஆனால் அவர் வழியிலேயே இறந்துவிட்டார். இதுகுறித்து லத்தேரி போலீசார் வழக்குப் பதிவு செய்து விசாரணை நடத்தி வருகின்றனர்.