போலீஸ் நிலைய மேற்கூரை இடிந்து விழுந்தது ஆவணங்கள் சேதம்

விழுப்புரம்,

விழுப்புரம் நகரில் போக்குவரத்து போலீஸ் நிலையத்திற்கு சொந்த கட்டிடம் கட்டிக்கொடுக்கப்படாததால் தற்காலிக இடங்களில் செயல்பட்டு வந்தது.

தற்போது விழுப்புரம் நான்குமுனை சந்திப்பு அருகில் உள்ள பழைய கட்டிடத்தில் கடந்த 6 ஆண்டுகளுக்கும் மேலாக செயல்பட்டு வந்தது.

இந்த போலீஸ் நிலையத்தில் இன்ஸ்பெக்டர் உள்ளிட்ட 25-க்கும் மேற்பட்ட போலீசார் பணியாற்றி வருகின்றனர்.

இடிந்து விழுந்தது

இங்குள்ள கட்டிடம் மிகவும் பழுதடைந்து காணப்பட்டதால் மழைக்காலங்களில் அவ்வப்போது கட்டிடத்தின் மேற்கூரை சிமெண்டு பூச்சுகள் பெயர்ந்து விழுந்த வண்ணம் இருந்தது. இதனால் போலீசார் ஒருவித அச்சத்துடனேயே பணியாற்றி வந்தனர்.

இந்நிலையில் கடந்த சில நாட்களாக விழுப்புரம் பகுதிகளில் பெய்து வந்த மழையின் காரணமாக போக்குவரத்து போலீஸ் நிலைய கட்டிடத்தின் சுவர்கள் மற்றும் மேல்தளம் தண்ணீரில் நனைந்து விரிசல் ஏற்பட்டிருந்தது. நேற்று முன்தினம் நள்ளிரவு திடீரென அந்த கட்டிடத்தின் மேற்கூரை இடிந்து விழுந்தது. இதைப்பார்த்த போலீசார் அதிர்ச்சியடைந்தனர். இதில் யாருக்கும் எந்தவித காயமும் ஏற்படாமல் அதிர்ஷ்டவசமாக தப்பினர். அதேநேரத்தில் போலீஸ் நிலையத்தில் உள்ள சில ஆவணங்கள் மட்டும் சேதமடைந்தன.

வேறு இடத்திற்கு மாற்றம்

இதுகுறித்து மாவட்ட போலீஸ் சூப்பிரண்டு ஸ்ரீநாதாவின் கவனத்திற்கு கொண்டு செல்லப்பட்டது. இதையடுத்து அவரது உத்தரவின்படி, போக்குவரத்து போலீஸ் நிலையம் தற்காலிகமாக நகர போலீஸ் நிலையத்துக்கு இடமாற்றம் செய்யப்பட்டு அங்கு செயல்பட தொடங்கியுள்ளது.