திறமையாக செயல்பட்ட போலீசாருக்கு சூப்பிரண்டு பாராட்டு

நாகை மாவட்டத்தில் கடந்த சில நாட்களாக வெளிமாநில சாராயம், மது பாட்டில்கள் விற்பனை மற்றும் கடத்தல் குற்றங்கள் அதிக அளவில் நடந்து வந்தது. இதனால் கிராம பகுதிகளில் படுஜோராக சாராய விற்பனை நடந்து வந்தது. இதனை கண்காணித்து, மது குற்றங்களை தடுக்க போலீஸ் சூப்பிரண்டு ஜவகர் உத்தரவின் பேரில் தனிப்படை அமைக்கப்பட்டது. மேலும் மாவட்டத்தில் 10 இடங்களில் தற்காலிக சோதனை சாவடிகளும் அமைக்கப்பட்டன. இங்கிருந்து தனிப்படை போலீசார் தீவிர கண்காணிப்பு பணியில் ஈடுபட்டு வருகின்றனர்.இதில் ஏராளமான சாராயம் கடத்தியவர்களை கைது செய்து, அவர்களிடம் இருந்து மோட்டார் சைக்கிளையும் பறிமுதல் செய்து வருகின்றனர். மது கடத்தலை கண்காணித்து தடுப்பது, தேடப்படும் குற்றவாளிகளை கைது செய்வது உள்ளிட்ட பணிகளில் திறமையாக பணியாற்றிய சப்-இன்ஸ்பெக்டர், சிறப்பு சப்-இன்ஸ்பெக்டர் உள்ளிட்ட தனிப்படை போலீசாரை போலீஸ் சூப்பிரண்டு ஜவகர் பாராட்டினார்.